ⲡⲃⲓⲟⲥ ⲛⲧⲙⲁⲕⲁⲣⲓⲁ ϩⲗⲗⲁⲣⲓⲁ
ⲧϣⲉⲉⲣⲉ ⲙⲡⲙⲁⲓⲛⲟⲩⲧⲉ ⲛⲣⲣⲟ ⲍⲏⲛⲱⲛ
ⲡⲉⲛⲧⲁϥϩⲓⲥⲧⲱⲣⲓⲍⲉ ⲙⲙⲟϥ ⲛϭⲓ ⲡⲡⲉⲧⲟⲩⲁⲁⲃ ⲁⲡⲁ ⲡⲁⲛⲃⲱ
ⲡⲉⲡⲣⲉⲥⲃⲉⲧⲩⲣⲟⲥ ⲛⲧⲉⲕⲕⲗⲏⲥⲓⲁ ⲛϣⲓⲏⲧ
ⲛⲧⲁⲥϫⲉⲕ ⲡⲉⲥⲃⲓⲟⲥ ⲉⲃⲟⲗ ⲛⲥⲟⲩϫⲟⲩⲧⲟⲩⲉ ⲙ̅ⲡⲉⲃⲟⲧ ⲧⲱⲃⲉ
ϩⲛ ⲟⲩⲉⲓⲣⲏⲛⲏ ⲛⲧⲉ ⲡⲛⲟⲩⲧⲉ ϩⲁⲙⲏⲛ
ⲁ ⲡⲛⲟⲩⲧⲉ ⲛⲇⲩⲙⲓⲟⲩⲣⲅⲟⲥ ⲭⲱⲣⲏⲅⲉⲓ ⲛⲁⲛ ⲛϩⲉⲛⲣⲉϥⲣⲟⲩⲟⲉⲓⲛ .
ⲉⲛⲉⲃⲁⲗ ⲛⲧⲉⲛⲯⲩⲭⲏ ⲙⲛ ⲡⲉⲛⲥⲱⲙⲁ ϩⲓⲟⲩⲥⲟⲡ ⲛⲁⲡⲥⲱⲙⲁ ⲙⲉⲛ
ⲁϥⲭⲱⲣⲏⲅⲉⲓ ⲛⲁⲛ ⲙⲡⲣⲏ ⲉⲧⲣⲉϥⲣⲟⲩⲟⲉⲓⲛ ⲉⲣⲟⲛ ⲙⲡⲉϩⲟⲟⲩ ⲁⲩⲱ
ⲡⲟⲟϩ ⲉⲧⲣⲉϥⲣⲟⲩⲟⲉⲓⲛ ⲉⲣⲟⲛ ⲛⲧⲉⲩϣⲏ ⲙⲡⲉϥϩⲱ ⲇⲉ ⲉⲣⲟϥ
ⲉⲛⲁⲓ ⲛϭⲓ ⲡⲛⲟⲩⲧⲉ ⲁⲗⲗⲁ ⲁϥⲕⲟⲥⲙⲉⲓ ⲙⲡⲉⲥⲧⲉⲣⲉⲩⲙⲁ ⲛϩⲉⲛⲥⲓⲟⲩ
ⲛⲣⲟⲩϩⲉ ⲙⲛ ϩⲉⲛⲥⲓⲟⲩ ⲛϩⲧⲟⲟⲩⲉ ⲉⲩϯⲙⲁⲉⲓⲛ ⲉⲛⲉⲩⲛⲟⲟⲩⲉ ⲛⲧⲉ-
ⲩϣⲏ. ⲛⲁⲧⲉⲯⲩⲭⲏ ⲇⲉ ϩⲱⲟⲩ ⲁϥⲕⲱ ⲛⲁⲛ ⲛⲛⲉⲅⲣⲁⲫⲏ ⲉⲧⲟⲩⲁⲁⲃ
ⲛⲣⲉϥⲣⲟⲩⲟⲉⲓⲛ ⲉⲧⲉ ⲛⲁⲓ ⲛⲉ ⲧⲡⲁⲗⲁⲓⲁ ⲙⲛ ⲧⲕⲏⲛⲏ. ϩⲟⲙⲁⲓⲱⲥ
ⲙⲡⲉϥϩⲱ ⲉⲣⲟϥ ⲉⲛⲁⲓ ⲛϭⲓ ⲡⲛⲟⲩⲧⲉ. ⲁⲗⲗⲁ ⲁϥⲧⲟⲩⲛⲟⲥ ⲛⲁⲛ
ⲛϩⲉⲛⲣⲉϥⲣϩⲩⲙⲙⲉ. ϩⲟⲓⲛⲉ ⲛⲥⲁϩ ϩⲉⲛⲕⲟⲟⲩⲉ ⲛⲣⲉϥⲧⲁϣⲉⲟⲉⲓϣ.
ⲕⲁⲗⲱⲥ ⲟⲩⲛ ⲁϥⲉⲓⲣⲉ ⲛⲧⲉⲓϩⲉ ⲛϭⲓ ⲡⲛⲟⲩⲧⲉ ⲡⲉⲛⲃⲁⲓⲣⲟⲟⲩϣ.
ⲕⲁⲓ ⲅⲁⲣ ⲙⲡⲟⲩⲉϣⲱⲫⲉⲗⲉⲓ ⲛⲛⲉⲫⲓⲗⲟⲥⲟⲫⲟⲥ ⲉⲧϩⲓⲃⲟⲗ ⲛϭⲓ
ⲛϣⲁϫⲉ ⲙⲡⲏⲟⲓⲧⲏⲥ () ⲛⲁⲣⲭⲁⲓⲱⲛ. ⲁⲗⲗⲁ ⲥⲉϣⲓⲛⲉ ⲛⲥⲁ ϩⲉⲛ-
ϣⲁϫⲉ ⲛⲃⲣⲣⲉ ⲕⲁⲧⲁ ⲑⲉ ⲛⲛⲧⲁ ⲛⲁⲑⲉⲛⲛⲁⲓⲟⲥ ϫⲟⲟⲥ ⲙⲡⲁⲩⲗⲟⲥ.
ⲛⲁϣ ⲛϩⲉ ⲛⲧⲉⲛⲛⲁⲣⲱⲕϩ ⲁⲛ ϩⲉⲛ ⲧⲉⲓⲉⲡⲓⲑⲩⲙⲓⲁ ⲙⲡⲛⲓⲕⲟⲛ ⲉϩ-
ⲟⲩⲛ ⲉⲛⲉⲡⲁϩⲣⲉ ⲉⲧϯⲕⲃⲟ ⲛⲛⲯⲩⲭⲏ. ⲁⲥϣⲱⲡⲉ ⲇⲉ ⲙⲡⲉⲩⲟⲉⲓϣ
ⲙⲡⲙⲁⲓⲛⲟⲩⲧⲉ ⲛⲣⲣⲟ ⲍⲏⲛⲱⲛ ⲁϥⲧⲣⲉ ⲧⲉⲕⲕⲗⲏⲥⲓⲁ ϣⲱⲡⲉ ϩⲉⲛ
ⲟⲩⲛⲟϭ ⲛⲕⲁⲧⲁⲥⲧⲁⲥⲓⲥ. ⲁϥⲧⲣⲉⲥϩⲣⲟⲕ ⲉⲃⲟⲗ ϩⲙ ⲡⲭⲓⲙⲱⲛ
ⲙⲡⲇⲱⲙⲟⲥ ⲛⲧⲁⲩϩⲩⲡⲟⲅⲣⲁⲫⲉ ⲉⲣⲟϥ ⲛϭⲓ ⲛⲉⲧϩⲁ ⲧⲉϥϩⲛ ⲉⲧⲉ
ⲗⲉⲱⲛ ⲡⲉ. ⲙⲛ ⲁⲩⲣⲏⲗⲗⲓⲁⲛⲟⲥ. ⲡⲁⲓ ⲙⲉⲛ ⲛⲧⲉⲣⲉϥϩⲙⲟⲟⲥ ϩⲓϫⲙ
ⲡⲉⲑⲣⲟⲛⲟⲥ ⲛⲧⲙⲛⲧⲉⲣⲟ ⲁϥⲟⲩⲱⲥϥ ⲛⲛⲉⲡⲣⲟⲥⲧⲁⲅⲙⲁ ⲙⲙⲛⲧⲁⲥⲉ-
ⲃⲏⲥ. ⲁⲩⲛⲟϭ ⲛϫⲁⲙⲏ ϣⲱⲡⲉ ⲙⲛ ⲟⲩⲉⲥⲩⲭⲓⲁ. ⲛⲣⲣⲟ ⲇⲉ
ⲛⲉⲙⲛⲧϥ ϣⲛⲣⲉ ⲛϩⲟⲟⲩⲧ ⲛⲥⲁ ϣⲉⲉⲣⲉ ⲥⲉⲛⲧⲉ ⲛⲥϩⲓⲙⲉ ⲙⲙⲁⲧⲉ.
ⲛⲁⲓ ⲇⲉ ⲁϥⲉⲛⲧⲟⲩ ⲉϩⲣⲁⲓ ϩⲉⲛ ⲟⲩⲛⲟϭ ⲛⲉⲡⲉⲓⲥϫⲛⲙⲉⲓ. ⲡϣⲟⲣⲡ
ⲙⲉⲛ ⲁϥⲧⲥⲁⲃⲟⲟⲩ ⲛⲥϩⲁⲓ ⲕⲁⲧⲁ ⲛⲁⲝⲓⲱⲙⲁ ⲛⲧⲙⲛⲧⲛⲟϭ ϩⲟⲙⲟⲓⲟⲥ
ⲡⲉϩⲟⲩⲟ ⲛⲛⲉⲯⲁⲗⲙⲟⲥ ⲁϥⲧⲣⲉⲩⲁⲡⲟⲥⲧⲏⲑⲓⲍⲉ ⲙⲙⲟⲟⲩ ⲧⲛⲟϭ ⲇⲉ
ⲡϣⲉⲉⲣⲉ ⲛⲉ ⲡⲉⲥⲣⲁⲛ ⲛⲉ ϩⲗⲗⲁⲣⲓⲁ ⲧⲕⲟⲩⲓ ⲇⲉ ⲛⲉ ⲡⲉⲥⲣⲁⲛ ⲡⲉ
ⲑⲉⲟⲡⲓⲥⲧⲏ ⲧⲛⲟϭ ⲇⲉ ⲛϣⲉⲉⲣⲉ ⲙⲡⲣⲣⲟ ⲛⲉⲩⲛ ⲟⲩⲛⲟϭ ⲛⲣⲟⲟⲩϣ
ϩⲓϫⲱⲥ ⲉⲉⲣⲡⲁⲣⲑⲉⲛⲟⲥ ⲙⲁⲗⲗⲟⲛ ⲇⲉ ⲛⲉⲉⲥⲉⲡⲓⲑⲩⲙⲉⲓ () ⲉⲧⲙⲛ-
ⲧⲁⲡⲟⲧⲁⲕⲧⲓⲕⲟⲥ ⲉⲧⲉ ⲧⲙⲛⲧⲙⲟⲛⲁⲭⲟⲥ ⲧⲉ ⲛⲉⲥⲣϩⲟⲧⲉ ⲅⲁⲣ ⲡⲉ
ⲉⲃⲱⲕ ⲉⲛⲉⲙⲟⲛⲁⲥⲧⲏⲣⲓⲟⲛ ⲙⲡⲃⲩⲥⲁⲛⲧⲓⲟⲛ ϫⲉ ⲛⲥⲉⲛⲁϣⲟⲡⲥ
ⲉⲣⲟⲟⲩ ⲁⲛ ⲉⲧⲃⲉ ⲛⲉⲥⲉⲓⲟⲧⲉ ⲛⲉⲩⲛ ⲟⲩⲛⲟϭ ⲛⲣⲟⲟⲩϣ ϣⲟⲟⲡ
ⲛⲁⲥ ϫⲉ ⲟⲩ ⲡⲉⲧⲥⲛⲁⲁⲁϥ ϣⲁⲛⲧⲉⲉⲓ ⲉϩⲟⲩⲛ ⲉⲡⲧⲱϩⲙ ⲉⲧⲟⲩⲁⲁⲃ
ⲛⲧⲙⲛⲧⲡⲁⲣⲑⲉⲛⲟⲥ. ⲁⲥϣⲱⲡⲉ ⲇⲉ ⲙⲡⲉϩⲟⲟⲩ ⲛⲧⲕⲩⲣⲓⲁⲕⲏ ⲁ
ⲡⲣⲣⲟ ⲃⲱⲕ ⲉⲧⲥⲩⲛⲁⲝⲓⲥ ⲙⲛ ⲧⲣⲣⲱ ⲙⲛ ⲧⲉϥϣⲉⲉⲣⲉ ⲥⲉⲛⲧⲉ.
ⲧⲙⲁⲕⲁⲣⲓⲁ ⲇⲉ ϩⲗⲗⲁⲣⲓⲁ ⲁⲥϥⲓ ⲛⲛⲉⲥⲃⲁⲗ ⲉϩⲣⲁⲓ ⲉⲧⲡⲉ ⲉⲥϫⲱ
ⲙⲙⲟⲥ ϫⲉ ⲡϫⲟⲉⲓⲥ ⲡⲛⲟⲩⲧⲉ ⲡⲡⲁⲛⲧⲟⲕⲣⲁⲧⲱⲣ. ⲉϣϫⲉ ⲕⲛⲁ-
ⲥⲟⲩⲧⲛ ⲧⲁϩⲓⲏ ϩⲙ ⲡϩⲱⲃ ⲉϯⲛⲁⲃⲱⲕ ⲉⲣⲟϥ ⲉⲓⲉ ⲙⲁⲣⲓⲥⲱⲧⲙ
ⲉϩⲉⲛⲁⲛⲁⲅⲛⲱⲥⲓⲥ ⲉⲩⲡⲣⲉⲡⲉⲓ ⲙⲡⲁⲥⲕⲟⲡⲟⲥ - ⲁⲩⲱ ⲛⲧⲉⲣⲉⲥⲃⲱⲕ
ⲉϩⲟⲩⲛ ⲉⲧⲉⲕⲕⲗⲏⲥⲓⲁ ⲛϣⲟⲣⲡ ⲙⲉⲛ ⲁⲥⲥⲱⲧⲙ ϩⲙ ⲡⲁⲡⲟⲥⲧⲟⲗⲟⲥ
ⲉⲧⲟⲩⲁⲁⲃ ϫⲉ ϩⲉⲛ ⲟⲩⲡⲓⲥⲧⲓⲥ ⲙⲡⲉ ⲙⲱⲩⲥⲏⲥ ⲟⲩⲱϣ ⲉⲧⲣⲟⲩ-
ⲙⲟⲩⲧⲉ ⲉⲣⲟϥ ϫⲉ ⲡϣⲏⲣⲉ ⲛⲧϣⲉⲉⲣⲉ ⲙⲫⲁⲣⲁⲱ ⲉⲁϥⲥⲟⲧⲡⲥ ⲛⲁϥ
ⲉϣⲉⲡϩⲓⲥⲉ ⲙⲛ ⲛⲗⲁⲟⲥ ⲙⲡⲛⲟⲩⲧⲉ. ⲉϩⲟⲩⲉ ⲉⲣⲟⲥ ⲉϫⲓ ⲛⲧⲁⲡⲟ-
ⲗⲁⲩⲥⲓⲥ ⲙⲡⲛⲟⲃⲉ ⲡⲣⲟⲥ ⲟⲩⲟⲉⲓϣ ⲉⲁϥⲉⲛ ⲡⲛⲟϭⲡⲉϭ ⲙⲡⲉⲭⲥ ϫⲉ
ϥⲧⲁⲓⲏⲩ ⲛⲁϩⲣⲁϥ ⲉϩⲟⲩⲉ ⲛⲁϩⲱⲱⲣ ⲧⲏⲣⲟⲩ ⲛⲕⲏⲙⲉ. ⲛⲉϥϭⲱϣⲧ
ⲅⲁⲣ ⲉⲡⲉⲧⲛⲁⲧⲱⲱⲃⲉ ⲛⲁϥ ⲛⲡⲉϥⲃⲏⲕⲉ () ϩⲟⲙⲁⲓⲟⲥ ⲇⲉ ⲟⲛ
ⲛⲉⲕⲁⲑⲟⲗⲓⲕⲟⲛ ϫⲉ ⲧⲙⲛⲧⲣⲙⲙⲁⲟ ⲙⲡⲉⲓⲕⲟⲥⲙⲟⲥ ⲉⲥⲟ ⲛⲑⲉ ⲛⲟⲩ-
ⲭⲟⲣⲧⲟⲥ. ⲁⲩⲱ ⲡⲉϥⲉⲟⲟⲩ ⲛⲑⲉ ⲙⲛⲉϩⲣⲏⲣⲉ ⲛⲭⲟⲣⲧⲟⲥ. ϩⲉⲛ
ⲛⲉⲡⲣⲁⲝⲓⲥ ⲇⲉ ⲟⲛ ϫⲉ ⲙⲡⲓⲉⲡⲉⲑⲩⲙⲉⲓ ⲉϩⲁⲧ. ⲟⲩⲇⲉ ⲛⲟⲩⲃ
ⲟⲩⲇⲉ ϩⲟⲓⲧⲉ. ⲛⲧⲱⲧⲛ ⲧⲉⲧⲛⲥⲟⲟⲩⲛ ϫⲉ ⲁ ⲛⲉⲓϭⲓϫ ϣⲙϣⲉ
ⲛⲛⲁⲭⲣⲓⲁ ⲙⲛ ⲛⲉⲧⲛⲙⲙⲁⲓ ϩⲟⲙⲁⲓⲟⲥ ⲇⲉ ⲟⲛ ϩⲛ ⲛⲉⲯⲁⲗⲙⲟⲥ ϫⲉ
ⲛⲉϥⲟⲩⲟϣ ⲥⲟⲧⲡ ⲉⲡⲛⲟⲩⲃ ⲙⲛ ⲡⲱⲛⲉ ⲙⲙⲉ ⲉⲧⲛⲁϣⲱϥ. ⲁⲩⲱ
ⲥⲉϩⲟⲗϭ ⲉⲡⲉⲃⲓⲱ ⲙⲛ ⲡⲙⲟⲩⲗϩ. ϩⲟⲙⲁⲓⲟⲥ ⲇⲉ ⲟⲛ ϩⲙ ⲡⲉⲩⲁⲅ-
ⲅⲉⲗⲓⲟⲛ ϫⲉ ⲡⲉⲧⲛϥⲛⲁⲁⲡⲟⲧⲁⲥⲥⲉ ⲁⲛ ⲛϩⲱⲃ ⲛⲓⲙ ⲉⲧⲉⲛⲧⲁϥ
ⲛ̅ϥⲟⲩⲁϩϥ̅ ⲛⲥⲱⲓ ⲙⲛ ϣϭⲟⲙ ⲙⲙⲟϥ ⲉⲉⲣⲙⲁⲑⲩⲧⲏⲥ ⲛⲁⲓ. ϩⲛ
ⲧⲕⲁⲑⲏⲕⲏⲥⲓⲥ ⲇⲉ ⲟⲛ ⲙⲡⲉⲡⲓⲥⲕⲟⲡⲟⲥ ⲉϥϫⲱ ⲙⲙⲟⲥ ϫⲉ ⲉⲧⲃⲉ
ⲟⲩ ⲱ̅ ⲡⲣⲱⲙⲉ ⲉⲕⲃⲓⲣⲟⲟⲩϣ ⲉⲛⲉⲧⲉⲕⲛⲁⲃⲱⲕ ⲛⲅⲕⲁⲁⲩ. ⲁⲣⲓ
ⲡⲙⲉⲉⲩⲉ ϫⲉ ⲥⲉⲛⲁⲡⲁⲣⲁⲅⲉⲓ ⲛϭⲓ ⲛⲉⲉⲡⲓⲑⲩⲙⲉⲓⲁ ⲙⲡⲉⲓⲕⲟⲥⲙⲟⲥ.
ⲙⲡⲉⲣⲧⲁϫⲣⲟⲕ ⲉϫⲛ ϩⲉⲛⲭⲣⲏⲙⲁ ⲙⲛ ⲟⲩⲛⲟⲩⲃ ⲙⲛ ⲟⲩϩⲁⲧ.
ⲛⲉⲭⲣⲏⲙⲁ ⲥⲉⲛⲁϭⲱ ⲙⲡⲉⲓⲙⲁ ⲛⲛⲟⲃⲉ ⲇⲉ ⲥⲉⲛⲁⲣϣⲟⲣⲡ ⲉⲣⲟⲛ ⲉⲡ-
ⲃⲏⲙⲁ ⲙⲡⲛⲟⲩⲧⲉ. ⲁⲩⲱ ⲡⲥⲉⲉⲡⲉ ⲉⲧⲛⲏⲩ ⲙⲛⲛⲥⲁ ⲛⲁⲓ. ⲛⲧⲉ-
ⲣⲉⲥⲥⲱⲧⲙ ⲇⲉ ⲉⲛⲁⲓ ⲛϭⲓ ⲧϣⲉⲉⲣⲉ ϣⲏⲙ ⲡⲉϫⲁⲥ ϫⲉ ⲁⲗⲏⲑⲱⲥ・
ⲁ ⲡⲛⲟⲩⲧⲉ ⲥⲟⲩⲧⲱⲛ ⲧⲁϩⲓⲏ. ⲛⲧⲉⲣⲟⲩⲕⲁ ⲧⲥⲩⲛⲁⲝⲓⲥ ⲇⲉ
ⲉⲃⲟⲗ ⲁⲥⲕⲁ ⲡⲣⲟⲟⲩϣ ϩⲙ ⲡⲉⲥϩⲏⲧ ⲁⲩⲱ ⲛⲉⲥⲥⲕⲉⲡⲧⲉⲓ ⲙⲙⲟⲥ
ϫⲉ ⲉⲥⲛⲁϯ ⲡⲉⲥⲟⲩⲟⲓ ⲉⲧⲁⲡⲟⲇⲏⲙⲓⲁ ⲛⲁϣ ⲛϩⲉ. ⲡⲛⲟⲩⲧⲉ
ⲇⲉ ⲁϥⲧⲁⲙⲟⲥ ⲉⲛⲉⲧⲉⲓϣϣⲉ ⲉⲣⲟⲥ ⲉⲁⲁⲩ ⲁⲥⲧⲱⲟⲩⲛ ⲛⲧⲡⲁϣⲉ
ⲛ-ⲧⲉ-(ⲟ)ⲩϣⲏ ⲙⲡⲉⲓϩⲟⲟⲩ ⲛⲟⲩⲱⲧ. ⲁⲥϯ ϩⲓⲱⲱⲥ ⲛⲟⲩⲥⲭⲏⲙⲁ
ⲛⲥⲡⲁⲑⲁⲣⲓⲟⲥ. ⲁⲥⲙⲟⲣ⳯ⲥ ⲛⲛ-ⲟⲩ-ⲙⲟⲩⲥ ⲛⲕⲁⲙⲡⲓⲥⲧⲣⲟⲛ ⲁⲩⲱ ⲁⲥϫⲓ
ⲛⲛⲟⲩⲥⲏϥⲉ ⲛⲛⲟⲩⲃ ⲉⲧⲉⲥϭⲓϫ. ⲁⲥⲉⲓ ⲉⲃⲟⲗ ⲉϫⲛ ⲑⲁⲗⲁⲥⲥⲁ.
ⲙⲡⲉ ⲗⲁⲁⲩ ⲥⲟⲩⲱⲛⲉⲥ ⲉⲡⲧⲏⲣϥ. ⲁⲥϩⲉ ⲉⲩϫⲟⲓ̈ ⲉϥⲛⲁϣϭⲏⲣ
ⲉⲩⲡⲟⲗⲓⲥ ϫⲉ ⲥⲁⲣⲁⲗⲏⲁ. ⲛⲉⲣⲉ ⲟⲩⲭⲁⲣⲧⲏⲥ ϩⲉⲛ ⲧⲉⲥϭⲓϫ ϩⲱⲥ
ⲉ-ϩⲉⲛ ⲥϩⲁⲓ ⲛⲧⲉ ⲡⲣⲣⲟ ⲛⲉ. ⲡⲉϫⲁⲥ ⲙⲡⲛⲉⲉⲃ ϫⲉ ϯⲟⲩⲱϣ
ⲉⲧⲣⲉ-ⲕ-ϫⲓ-ⲧ ⲉⲧⲡⲟⲗⲓⲥ ⲣⲁⲕⲟⲧⲉ ϫⲉ ⲡϩⲱⲃ ⲛ-ⲁⲡⲇⲉⲥⲡⲟⲧⲏⲥ ⲡⲉ.
ⲁⲩⲱ ⲙⲛ ϣϭⲟⲙ ⲙⲙⲟⲓ̈ ⲉⲟⲩⲟⲛϩϥ ⲉⲃⲟⲗ. ⲡⲉϫⲉ ⲡⲛⲏⲏⲃ ⲛⲁⲥ
ϫⲉ ⲕⲩⲣⲉⲏ ⲥⲧⲣⲁⲧⲏⲗⲁⲧⲏⲥ ⲛⲉⲛⲃⲏⲕ ⲁⲛ ⲉⲡⲙⲁ ⲉⲧⲙⲙⲁⲩ. ⲁⲗⲗⲁ
ⲉϣϫⲉ ⲡϩⲱⲃ ⲡⲁⲡⲣⲣⲟ ⲡⲉ ⲙⲛ ϣϭⲟⲙ ⲙⲙⲟⲓ̈ ⲉⲕⲱⲗⲏ ⲙⲙⲟϥ.
ⲁⲩⲱ ⲛⲧⲉⲓ̈ϩⲉ ⲁⲩⲧⲁⲗⲟⲥ ⲁⲩⲉⲛⲧⲥ ⲉϩⲟⲩⲛ ⲉⲣⲁⲕⲟⲧⲉ. ⲧϣⲉⲉⲣⲉ
ⲇⲉ ϣⲏⲙ ⲛⲉⲥϩⲉⲛ ⲁⲙⲛⲧϣⲙⲏⲛⲉ ⲛⲣⲟⲙⲡⲉ. ⲁⲩⲱ ⲛⲉⲩ-ϫⲁⲣ-ϩⲏ̄ⲧ
ⲧⲉ ϩⲙ ⲡⲉⲥϩⲏⲧ. ⲁⲩⲱ ⲛⲧⲉⲣⲉⲥⲃⲱⲕ ⲉϩⲟⲩⲛ ⲉⲣⲁⲕⲟⲧⲉ ⲁⲥϯ
ⲡⲉⲥⲟⲩⲟⲓ̈ ϩⲛ ⲑⲟⲣⲙⲏ ⲙⲡⲉⲥⲡⲛ⳯ⲁ⳯. ⲁⲥⲃⲱⲕ ⲉϩⲟⲩⲛ ⲉⲡⲧⲟⲡⲟⲥ
ⲙⲡϩⲁⲅⲓⲟⲥ ⲡⲉⲧⲣⲟⲥ ⲡⲁⲣⲭⲏⲉⲡⲓⲥⲕⲟⲡⲟⲥ ⲁⲥϣⲗⲏⲗ ⲉⲥϫⲱ ⲙⲙⲟⲥ
ϫⲉ ⲡϩⲁⲅⲓⲟⲥ ⲡⲉⲧⲣⲟⲥ ⲡⲁⲣⲭⲏⲉⲡⲓⲥⲕⲟⲡⲟⲥ ⲡⲁⲣⲁⲕⲁⲗⲉⲓ ⲙⲡⲉⲭ⳯ⲥ⳯
ⲛϥⲇⲓ̈ⲏⲕⲉⲓ̈ ⲙⲡⲁⲃⲓⲟⲥ ⲕⲁⲧⲁ ⲡⲉϥⲟⲩⲱϣ. ⲛⲧⲉⲣⲉ ϩⲧⲟⲟⲩⲉ ⲇⲉ
ϣⲱⲡⲉ ⲁⲥⲛⲁⲩ ⲉⲡⲙⲏⲏϣⲉ ⲉⲩⲫⲱⲣⲉⲓ̈ ⲛϩⲉⲛϩⲉⲃⲥⲱ ⲉⲩⲟⲩⲟⲃϣ
ⲉⲩⲡⲏⲧ ⲉⲧⲕⲁⲑⲟⲗⲓ̈ⲕⲏ ⲉⲛⲉ ⲡⲉϩⲟⲟⲩ ⲡⲉ ⲙⲡϩⲁⲅⲓⲟⲥ ⲙⲁⲣⲕⲟⲥ
ⲡⲉⲩⲁⲅⲅⲉⲗⲓⲥⲧⲏⲥ. ⲧⲙⲁⲕⲁⲣⲓⲁ ⲇⲉ ⲁⲥⲉⲡⲓⲑⲩⲙⲉⲓ ⲉⲃⲱⲕ ⲛⲙⲙⲁⲩ.
ⲁⲩⲱ ⲛⲧⲉⲣⲉⲥⲁⲗⲏ ⲉϩⲣⲁⲓ̈ ⲉϫⲛ ⲛⲉⲧⲱⲣⲧⲣ ⲙⲡϩⲁⲅⲓⲟⲥ ⲙⲁⲣⲕⲟⲥ
ⲁⲥⲱϣ ⲉⲃⲟⲗ ⲉⲥϫⲱ ⲙⲙⲟⲥ ϫⲉ ⲡϫⲟⲉⲓⲥ ⲉϣϫⲉ ⲕⲛⲁⲥⲟⲩⲧⲛ
ⲧⲁϩⲓ̈ⲏ ϩⲉⲛ ⲟⲩⲙⲉ ⲉⲓ̈ⲉ ⲙⲁⲣⲓⲥⲱⲧⲉⲙ ⲉϩⲉⲛⲁⲛⲁⲅⲛⲱⲥⲓⲥ (?) ⲉⲩϫⲓ
ⲉϩⲟⲩⲛ ⲉⲣⲟⲓ ⲕⲁⲧⲁ ⲑⲉ ⲛⲧⲁⲓ̈ⲥⲟⲧⲙⲟⲩ ϩⲉⲛ ⲕⲱⲥⲧⲁⲛⲧⲓⲛⲟⲩⲡⲟⲗⲓⲥ.
ⲛⲧⲉⲣⲉⲥⲃⲱⲕ ⲇⲉ ⲉϩⲟⲩⲛ ⲉⲡⲙⲁⲣⲧⲏⲣⲓⲟⲛ ⲁⲥⲥⲱⲧⲙ ϩⲙ ⲡⲁⲡⲟⲥ-
ⲧⲟⲗⲟⲥ ϫⲉ ⲛⲉⲧⲙⲉ ⲙⲡⲛⲟⲩⲧⲉ. ϣⲁⲣⲉ ⲡⲛⲟⲩⲧⲉ ϯⲧⲟⲟⲧⲟⲩ
ϩⲉⲛ ϩⲱⲃ ⲛⲓⲙ ⲉⲡⲁⲅⲁⲑⲱⲛ ⲛⲉⲧⲧⲁϩⲙ ⲕⲁⲧⲁ ⲛⲉϥⲟⲩⲱϣ ⲛⲁⲓ̈
ⲛⲧⲁϥϣⲣⲡⲥⲟⲩⲱⲛⲟⲩ. ϩⲉⲛ ⲛⲉⲕⲁⲑⲟⲗⲓ̈ⲕⲟⲛ ⲇⲉ ⲟⲛ ⲙⲡⲉⲣⲙⲉⲣⲓ
ⲡⲕⲟⲥⲙⲟⲥ. ⲟⲩⲇⲉ ⲛⲉⲧϩⲙ ⲡⲕⲟⲥⲙⲟⲥ. ϩⲉⲛ ⲛⲉⲡⲣⲁⲝⲓⲥ ⲇⲉ
ⲟⲛ ϫⲉ ⲟⲩⲁⲅⲅⲉⲗⲟⲥ ⲛⲧⲉ ⲡϫⲟⲉⲓⲥ ⲁϥⲟⲩⲟⲛϩϥ ⲉⲡⲉⲧⲣⲟⲥ ⲡⲉϫⲁϥ
ⲛⲁϥ ϫⲉ ⲙⲟⲣⲕ. ⲙⲁ ⲡⲉⲕⲥⲁⲛⲧⲁⲗⲓⲟⲛ ⲉⲣⲁⲧⲕ ⲛⲅϯ ⲛⲧⲉⲕϣ-
ⲧⲏⲛ ⲉϩⲓⲱⲱ(ⲧ)ⲕ (sic). ⲁⲩⲱ ⲛⲅⲟⲩⲁϩⲕ ⲛⲥⲱⲓ̈. ϩⲙ ⲡⲁⲗⲗⲏⲗⲟⲩⲓ̈ⲁ ⲇⲉ
ⲟⲛ ϫⲉ ϥⲛⲁⲥⲙⲛ ⲛⲟⲙⲟⲥ ⲛⲁϥ ϩⲉⲛ ⲧⲉϩⲓ̈ⲏ ⲛⲧⲁϥⲟⲩⲁϣⲥ. ϩⲙ
ⲡⲉⲩⲁⲅⲅⲉⲗⲓ̈ⲟⲛ ⲇⲉ ⲟⲛ ϫⲉ ⲉⲓⲥ ϩⲏⲏⲧⲉ ϯⲛⲁϫⲟⲟⲩ ⲙⲡⲁⲁⲅⲅⲉⲗⲟⲥ
ϩⲁ ⲧⲉⲕϩⲏ ⲛϥⲥⲟⲟⲩⲧⲛ(?) ⲛⲧⲉⲕϩⲓ̈ⲏ ⲙⲡⲉⲕⲙⲧⲟ ⲉⲃⲟⲗ ϩⲉⲛ ⲧⲕⲁⲑⲩ-
ⲅⲉⲥⲓⲥ ⲇⲉ ⲟⲛ ⲙⲡⲁⲣⲭⲏⲉⲡⲓⲥⲕⲟⲡⲟⲥ ⲉⲧⲙⲛⲛⲥⲁ ⲡⲉⲩⲁⲁⲅⲅⲉⲗⲓⲟⲛ ()
ϫⲉ ⲙⲡⲣⲣⲉⲙⲕⲁϩⲛϩⲏⲧ ϫⲉ ⲁⲕⲁⲡⲟⲧⲁⲥⲥⲉ ⲛϩⲉⲛⲭⲣⲏⲙⲁ. ⲁⲣⲓ
ⲡⲙⲉⲉⲩⲉ ⲙⲡϫⲟⲉⲓⲥ ⲉϥϫⲱ ⲙⲙⲟⲥ ϩⲙ ⲡⲉⲩⲁⲅⲅⲉⲗⲓⲟⲛ ⲛⲛⲉϥ-
ⲙⲁⲑⲩⲧⲏⲥ ϫⲉ ⲛⲧⲱⲧⲛ ⲛⲉⲛⲧⲁⲩⲕⲁ ⲏⲓ̈ ⲛⲥⲱⲟⲩ ϩⲓ ⲥϩⲓⲙⲉ ϩⲓ
ϣⲏⲣⲉ ϩⲣⲁⲓ ϩⲙ ⲡⲉϫⲡⲟ ⲛⲕⲉⲥⲟⲡ ⲧⲉⲧⲛⲛⲁϫⲓⲧⲟⲩ ⲛⲛⲟⲩⲁⲧⲁ
ⲛⲕⲱⲃ ⲛⲥⲟⲡ ⲁⲩⲱ ⲛⲧⲉⲧⲛⲕⲗⲏⲣⲟⲛⲟⲙⲉⲓ ⲙⲡⲱⲛϩ ϣⲁ ⲉⲛⲉϩ --
ⲛⲁⲓ̈ ⲇⲉ ⲛⲧⲉⲣⲉⲥⲥⲱⲧⲙ ⲉⲣⲟⲟⲩ ⲛϭⲓ ⲧⲙⲁⲕⲁⲣⲓⲁ ϩⲗⲗⲁⲣⲓⲁ ⲁⲥ-
ⲥⲟ⳯ⲗⲥ⳯ⲗ ⲉⲙⲁⲧⲉ ⲁⲩⲱ ⲁⲥⲁⲓⲧⲉⲓ ⲙⲡϩⲁⲅⲓⲟⲥ ⲙⲁⲣⲕⲟⲥ ⲉⲥϫⲱ ⲙⲙⲟⲥ
ϫⲉ ϣⲱⲡⲉ ⲛⲁⲓ ⲛⲃⲱⲏⲑⲟⲥ ⲛⲅⲉⲣϩⲙⲙⲉ ⲙⲙⲟⲓ̈ ϫⲉ ⲁⲛⲅ ⲟⲩ-
ϣⲙⲙⲟ ⲛϯⲥⲟⲟⲩⲛ ⲁⲛ ⲛⲣⲱⲙⲉ ϩⲛ ⲧⲉⲓ̈ⲡⲟⲗⲓⲥ -- ⲛⲧⲉⲣⲟⲩⲕⲁ
ⲧⲥⲩⲛⲁⲝⲓⲥ ⲇⲉ ⲉⲃⲟⲗ ⲁⲥϯ ⲡⲉⲥⲟⲩⲟⲓ̈ ⲉⲩⲇⲓⲁⲕⲟⲛⲟⲥ ⲛⲣⲙⲛⲟⲩⲧⲉ
ⲉⲡⲉϥⲣⲁⲛ ⲡⲉ ⲑⲉⲟⲇⲱⲣⲟⲥ. ⲡⲉϫⲁⲥ ⲛⲁϥ ϫⲉ ⲡⲁⲥⲟⲛ ⲡⲇⲓⲁⲕⲱⲛ.
ϯⲟⲩⲱϣ ⲉⲧⲣⲉⲕⲉⲓ̈ ⲛⲙⲙⲁⲓ̈ ⲉϣⲓ̈ⲏⲧ <ⲛ>ⲧⲁϯ ⲛⲁⲕ ⲙⲡⲉⲕⲃⲉⲕⲉ ϫⲉ
ⲧⲓ̈ⲉⲡⲉⲑⲩⲙⲉⲓ ⲉⲃⲱⲕ ⲉⲙⲁⲩ <ⲛ>ⲧⲁϣⲗⲏⲗ ⲁⲩⲱ ⲛϯⲛⲟⲓ̈ ⲁⲛ ⲉⲧⲉϩⲓ̈ⲏ.
ⲛⲧⲁⲓ̈ⲉⲓ ⲅⲁⲣ ⲉⲃⲟⲗ ϩⲙ ⲡⲃⲩⲥⲁⲛⲧⲓⲟⲛ ⲉⲡⲉⲓ̈ϩⲱⲃ. ⲁϥⲟⲩⲱϣϥ ⲛⲁⲥ
ⲛϭⲓ ⲡⲇⲓⲁⲕⲟⲛⲟⲥ ϫⲉ ⲕⲩⲣⲓ̈ ⲥⲡⲁⲑⲁⲣⲓ̈ⲉ (?) ⲉⲓⲥ ⲟⲩⲙⲏⲏϣⲉ ⲛⲟⲩⲟⲉⲓϣ
ϯⲉⲡⲓⲑⲩⲙⲉⲓ ⲉⲃⲱⲕ ⲉⲡⲙⲁ ⲉⲧⲙⲙⲁⲩ ⲧⲁϣⲗⲏⲗ ⲁⲩⲱ ⲧⲁⲙⲛⲧⲁ-
ⲙⲉⲗⲏⲥ (?) ⲙⲛ ⲛⲉⲣⲟⲟⲩϣ ⲕⲱⲗⲩ ⲙⲙⲟⲓ̈ ϣⲁ ⲧⲉⲛⲟⲩ. ⲡⲁⲛⲧⲱⲥ
ⲡⲧⲱϣ ⲙⲡⲛⲟⲩⲧⲉ ⲡⲉ ⲛⲧⲁⲕⲉⲓ̈ ϫⲉ ⲉⲓ̈ⲉⲉⲓ̈ ⲛⲙⲙⲁⲕ. ⲡⲗⲏⲛ
ⲧⲕⲩⲣⲓⲁⲕⲏ ⲡⲟⲟⲩ ⲁⲙⲟⲩ ⲛⲧⲉⲛⲟⲩⲱⲙ ⲙⲛ ⲛⲉⲛⲉⲣⲏⲩ. ⲁⲩⲱ
ⲛϩⲧⲟⲟⲩⲉ—ϩⲙ ⲡⲟⲩⲱϣ ⲙⲡⲛⲟⲩⲧⲉ—ⲧⲉⲛⲛⲁⲃⲱⲕ. ⲧⲙⲁⲕⲁⲣⲓⲁ ⲇⲉ
ⲡⲉϫⲁⲥ ⲛⲁϥ ϫⲉ ⲕⲁⲗⲱⲥ ⲛⲁⲛⲟⲩ ⲡϣⲁϫⲉ ⲛⲧⲁⲕϫⲟⲟϥ. ϫⲓ
ⲛⲧⲟⲟⲧ ⲛⲧⲉⲓ̈ϩⲟⲗⲟⲕⲟⲧⲧⲓⲛⲟⲥ. ϣⲱⲡ ⲛⲁⲛ ⲛⲧⲉⲛⲭⲣⲓⲁ ⲛϩⲏⲧⲥ.
ⲡⲥⲉⲉⲡⲉ ⲇⲉ ⲧⲉⲛⲛⲁϫⲟϥ ⲉⲃⲟⲗ ⲉⲣⲟⲛ ⲉⲧⲉϩⲓ̈ⲏ. ⲡⲇⲓⲁⲕⲟⲛⲟⲥ ⲇⲉ
ⲁϥⲉⲓⲣⲉ ⲙⲡⲉⲥⲟⲩⲱϣ. ⲁϥϫⲓ ⲛⲧⲟⲟⲧⲥ ⲙⲡⲛⲟⲙⲓⲥⲙⲁ. ⲁⲩⲟⲩⲱⲙ
ⲙⲛ ⲛⲉⲩⲉⲣⲏⲩ ⲙⲡⲉϩⲟⲟⲩ ⲉⲧⲙⲙⲁⲩ. ⲙⲡⲉϥⲣⲁⲥⲧⲉ ⲇⲉ ⲁⲩⲧⲱϣ
ⲛϩⲉⲛⲧⲃⲛⲟⲟⲩⲉ ⲁⲩⲁⲗⲏ ⲉⲣⲟⲟⲩ. ⲁⲩⲉⲓ ⲉⲡⲧⲟⲡⲟⲥ ⲛⲁⲡⲁ ⲙⲏⲛⲁ.
ⲙⲛⲛⲥⲁ ⲛⲁⲓ ⲁⲩⲉⲓ ⲉϣⲓⲏⲧ. ⲁⲩϣⲓⲛⲉ ⲛⲥⲁ ⲧⲉⲕⲕⲗⲏⲥⲓⲁ ⲁⲩⲧⲥⲁ-
ⲃⲟⲟⲩ ⲉⲣⲟⲥ. ⲁⲩⲱ ⲛⲧⲉⲣⲟⲩϫⲓ ⲛⲟⲩⲱ ⲉϩⲟⲩⲛ ⲙⲡⲉⲡⲣⲉⲥⲃⲩⲧⲉⲣⲟⲥ
ⲉⲧⲟⲩⲁⲁⲃ ⲁⲡⲁ ⲡⲁⲛⲃⲱ ϫⲉ ⲉⲓⲥ ⲟⲩⲥⲡⲁⲑⲁⲣⲓⲟⲥ ⲛⲧⲉ ⲣⲁⲕⲟⲧⲉ
ⲁϥⲉⲓ̈ ⲙⲛ ⲟⲩⲇⲓⲁⲕⲟⲛⲟⲥ ⲉⲩⲟⲩⲱϣ ⲉⲁⲡⲁⲛⲧⲁ ⲉⲣⲟⲕ. ⲁⲩⲱ ()
ⲁϥⲕⲩⲗⲉⲩⲉ ⲉⲧⲣⲉⲩⲉⲛⲧⲟⲩ ⲉϩⲟⲩⲛ. ⲁⲩⲱ ⲁϥϣⲗⲏⲗ ⲛⲙⲙⲁⲩ.
ⲕⲁⲧⲁ ⲧⲥⲩⲛⲏⲑⲓ̈ⲁ ⲛⲛⲉⲥⲛⲏⲩ. ⲁⲩⲱ ⲛⲧⲣⲟⲩϩⲙⲟⲟⲥ ⲁϥϫⲱ ⲛⲁⲩ
ⲛⲛⲉⲧⲉⲣⲛⲟⲃⲣⲉ ⲛⲛⲉⲩⲯⲩⲭⲏ—ⲧⲙⲁⲕⲁⲣⲓ̈ⲁ ⲇⲉ ϩⲗⲗⲁⲣⲓ̈ⲁ ⲁⲥϣ-
ⲁϫⲉ ⲙⲛ ⲁⲡⲁ ⲡⲁⲙⲃⲱ ⲡⲉⲡⲣⲉⲥⲃⲩⲧⲉⲣⲟⲥ ⲉⲥϫⲱ ⲙⲙⲟⲥ ϫⲉ
ϯⲟⲩⲱϣ ⲡⲁⲉⲓⲱⲧ ⲉⲧⲣⲉⲕⲁⲁⲧ ⲙⲙⲟⲛⲁⲭⲟⲥ ⲧⲁϭⲱ ϩⲁⲑⲏⲕ.
ⲡⲡⲉⲧⲟⲩⲁⲁⲃ ⲇⲉ ⲡⲉϫⲁϥ ⲛⲁⲥ ϫⲉ ⲡⲁϣⲏⲣⲉ ⲙⲛ ϣϭⲟⲙ ⲙⲙⲟⲕ
ⲉϭⲱ ϩⲁⲑⲏⲛ. ⲉⲡⲓ̈ⲇⲏ ⲛⲧⲁⲕⲉⲓ̈ ⲉϩⲣⲁⲓ̈ ϩⲛ ⲟⲩⲙⲟⲧⲛⲉⲥ ⲛⲥⲱⲙⲁ --
ⲁⲗⲗⲁ ⲉϣϫⲉ ⲕⲟⲩⲱϣ ⲉⲉⲣⲙⲟⲛⲁⲭⲟⲥ ⲃⲱⲕ ⲛⲁⲕ ⲉⲡϩⲉⲛⲁⲧⲟⲛ.
ⲡⲙⲁ ⲙⲡⲉⲙⲧⲟⲛ ⲡⲉ ⲟⲩⲉⲛ ⲟⲩⲁϣⲏ ⲅⲁⲣ ⲛⲣⲱⲙⲉ ϩⲙ ⲡⲙⲁ ⲉⲧⲙ-
ⲙⲁⲩ ⲉⲁⲩⲣⲙⲟⲛⲁⲭⲟⲥ ⲉϩⲉⲛⲣⲙⲙⲁⲩ ⲛⲉ ⲉⲙⲁⲧⲉ ⲁⲩⲱ ⲥⲉϭⲓⲛⲉ
ⲛⲧⲉⲩⲙⲟⲧⲛⲉⲥ ⲙⲛ ⲡⲉⲩⲥⲟ⳯ⲗⲥ⳯ⲗ -- ⲁⲛⲟⲛ ⲇⲉ ⲧⲛⲟⲩⲏⲩ ⲛⲕⲏⲙⲉ
ⲛϩⲙⲉ ⲙⲙⲓ̈ⲗⲓⲟⲛ ⲁⲩⲱ ⲙⲛ ⲁⲡⲁⲛⲧⲁ ⲉϩⲁϩ ⲛⲣⲱⲙⲉ. ⲉⲓⲙⲏⲧⲉⲓ̈
ϩⲉⲛⲟⲩⲁ ⲟⲩⲁ ⲉϣⲁⲩⲉⲓ ⲉϭⲙ ⲡⲉⲛϣⲓⲛⲉ ⲉⲧⲃⲉ ⲧⲁⲅⲁⲡⲏ ⲙⲡⲛⲟⲩⲧⲉ.
ⲁⲩⲱ ⲙⲛⲧⲁⲛ ⲛⲗⲁⲁⲩ ⲛⲥⲟⲗⲥ⳯ⲗ ⲙⲙⲁⲩ ⲛⲥⲱⲙⲁⲧⲓⲕⲟⲛ ϣⲁ
ⲉϩⲣⲁⲓ̈ ⲉⲧⲛⲕⲉϩⲃⲥⲱ ⲥϣⲟⲟⲡ ⲛⲁⲛ ϩⲛ ⲟⲩϭⲱϫⲃ. ⲛⲧⲟⲕ ⲇⲉ ⲛⲧⲁ-
ⲕⲉⲓ̈ ⲉϩⲣⲁⲓ̈ ϩⲉⲛ ⲟⲩⲙⲟⲧⲛⲉⲥ ⲛⲥⲱⲙⲁ. ⲙⲛ ϣϭⲟⲙ ⲙⲙⲟⲕ ⲉϥⲓ
ϩⲁ ⲛⲉⲓ̈ϩⲓⲥⲉ ⲛⲧⲉⲓ̈ⲙⲓⲛⲉ. ⲧⲙⲁⲕⲁⲣⲓⲁ ⲇⲉ ⲙⲡⲁⲣⲑⲉⲛⲟⲥ ⲁⲥⲟⲩⲱϣϥ
ⲡⲉϫⲁⲥ ϫⲉ ⲡⲁⲉⲓⲱⲧ ⲛⲧⲁⲓ̈ⲉⲓ̈ ⲉⲡⲓⲙⲁ ϩⲙ ⲡⲁϩⲏⲧ ⲧⲏⲣϥ[.] ⲉⲕϣⲁⲛ-
ⲛⲟϫⲧ ⲉⲃⲟⲗ ⲛⲧⲟⲕ ⲉⲧⲛⲁϯⲗⲟⲅⲟⲥ ⲙⲡⲛⲟⲩⲧⲉ ϩⲁ ⲧⲁⲯⲩⲭⲏ.
ⲡⲡⲉⲧⲟⲩⲁⲁⲃ ⲇⲉ ⲁϥⲣϣⲡⲏⲣⲉ ⲛⲧⲁⲡⲟⲗⲟⲅⲓⲁ ⲛⲧⲕⲟⲩⲓ̈ ⲛϣⲉⲉⲣⲉ.
ⲁⲩⲱ ⲁϥϯ ⲛⲁⲩ ⲛⲟⲩⲙⲁ ⲉⲧⲣⲉⲩⲟⲩⲱϩ ⲛϩⲏⲧϥ ⲛⲧⲟⲥ ⲙⲛ ⲡⲇⲓⲁ-
ⲕⲟⲛⲟⲥ. ⲙⲛⲛⲥⲁ ϯⲟⲩ ⲇⲉ ⲛϩⲟⲟⲩ ⲁ ⲡⲇⲓⲁⲕⲟⲛⲟⲥ ϯ ⲡⲉϥⲟⲩⲟⲓ
ⲉⲡⲉⲡⲣⲉⲥⲃⲩⲧⲉⲣⲟⲥ ⲉⲧⲟⲩⲁⲁⲃ ⲁⲡⲁ ⲡⲁⲙⲃⲱ[.] ⲡⲉϫⲁϥ ⲛⲁϥ ϫⲉ
ⲡⲁⲉⲓⲱⲧ ⲁⲓ̈ϯϩⲓⲥⲉ ⲛⲧⲉⲕⲙⲛⲧⲡⲉⲧⲟⲩⲁⲁⲃ ⲉⲓ̈ⲟⲩⲱϣ ⲉⲃⲱⲕ ⲛⲁⲓ
ⲉⲧⲁⲡⲟⲗⲓⲥ -- ⲧⲙⲁⲕⲁⲣⲓⲁ ⲇⲉ ϩⲗⲗⲁⲣⲓⲁ ⲡⲉϫⲁⲥ ⲛⲁϥ ϫⲉ ⲡⲁⲉⲓⲱⲧ
ϫⲓ ⲛⲧⲟⲟⲧ ⲙⲡⲉⲛⲧⲁⲓ̈ⲉⲛⲧϥ ⲛⲅⲥⲟⲣϥ ⲛⲛⲉϩⲏⲕⲉ ⲙⲛ ⲛⲉⲥⲛⲏⲩ
ⲉⲧⲉⲣⲭⲣⲓ̈ⲁ. ⲛⲧⲟϥ ⲇⲉ ⲡⲉϫⲁϥ ⲛⲁϥ ϫⲉ ⲡⲁϣⲏⲣⲉ ⲙⲛ ⲣⲭⲣⲓⲁ
ⲛϩⲱⲃ ⲛⲧⲉⲓ̈ⲙⲓⲛⲉ ⲁⲗⲗⲁ ϫⲉ ⲉⲣⲉ ⲡⲉⲛϩⲱⲃ ⲛϭⲓϫ ⲣⲱϣⲉ ⲉⲣⲟⲛ
ⲙⲛ ⲛⲕⲟⲟⲩⲉ ⲉⲧⲛⲏⲩ ⲉϫⲱⲛ. ⲁⲩⲱ ⲉϣϫⲉ ⲕⲟⲩⲱϣ ⲉⲁⲡⲟⲧⲁⲥⲥⲉ
ϩⲙ ⲡⲉⲕϩⲏⲧ ⲧⲏⲣϥ ϯ ⲙⲡⲉⲧⲛⲧⲟⲟⲧⲕ ⲙⲡⲇⲓⲁⲕⲟⲛⲟⲥ ⲛϥⲧⲁⲁϥ
ⲙⲡⲁⲣⲭⲏⲉⲡⲓⲥⲕⲟⲡⲟⲥ ⲛϥϫⲟⲟⲩ ⲉⲃⲟⲗ ⲉⲧⲇⲓⲁⲕⲟⲛⲓ̈ⲁ ⲛⲛϩⲏⲕⲉ --
ⲧⲙⲁⲕⲁⲣⲓⲁ ⲇⲉ ϩⲗⲗⲁⲣⲓⲁ ⲁⲥϯ ⲙⲡⲉⲧⲛⲧⲟⲟⲧⲥ ⲙⲡⲇⲓⲁⲕⲟⲛⲟⲥ
ⲉⲧⲉ ⲧⲥⲏⲃⲉ ⲛⲛⲟⲩⲃ ⲧⲉ ⲉⲧϩⲉⲛ ⲧⲉⲥϭⲓϫ ⲙⲛ ⲡⲙⲟⲩⲥ ⲛⲛⲟⲩⲃ
ⲉⲧⲙⲏⲣ ⲙⲙⲟⲥ -- ⲡⲇⲓ̈ⲁⲕⲟⲛⲟⲥ ⲇⲉ ⲁϥⲉⲓ ⲉⲃⲟⲗ ϩⲓⲧⲟⲟⲧⲟⲩ.
ⲧⲙⲁⲕⲁⲣⲓ̈ⲁ ⲇⲉ ϩⲗⲗⲁⲣⲓⲁ ⲁⲥϯ ⲡⲉⲥⲟⲩⲟⲓ ⲉⲡⲉⲡⲣⲉⲥⲃⲩⲧⲉⲣⲟⲥ ⲁⲡⲁ
ⲡⲁⲙⲃⲱ ⲡⲉϫⲁⲥ ⲛⲁϥ ϫⲉ ⲡⲁⲉⲓ̈ⲱⲧ ⲉⲧⲟⲩⲁⲁⲃ ⲉⲓ̈ⲟⲩⲉϣ ⲟⲩⲥⲭⲏⲙⲁ
ⲙⲙⲟⲛⲁⲭⲟⲥ. ⲁⲩⲱ ⲁϥϯ ⲛⲁⲥ ⲛⲟⲩⲗⲉⲃⲓⲧⲟⲛ ⲙⲛ ⲟⲩϣⲧⲏⲛ
ⲛⲃⲱ ⲁⲩⲱ ⲁⲥⲃⲱⲕ ⲉⲩⲥⲁ ⲙⲁⲩⲁⲁⲥ. ⲁⲥⲕⲁⲁⲥ ⲕⲁϩⲏⲩ ⲛⲛⲉϩⲟⲓ̈ⲧⲉ
ⲉⲧϩⲓϫⲱⲥ. ⲁⲥϯ ϩⲓⲱⲱⲥ ⲛⲧⲗⲉⲃⲓⲧⲟⲛ. ⲁⲥⲉⲓ̈ ϣⲁ ⲡⲡⲉⲧⲟⲩⲁⲁⲃ.
ⲁⲩⲱ ⲁϥⲙⲟⲣ̄ⲥ̄ ϩⲉⲛ ⲛⲉϥϭⲓϫ ⲉⲧⲟⲩⲁⲁⲃ. ⲛⲉϥⲥⲟⲟⲩⲛ ⲇⲉ ⲁⲛ ϫⲉ
ⲟⲩⲥϩⲓⲙⲉ ⲧⲉ. ⲁϥϯ ⲛⲁⲥ ⲛⲟⲩⲣⲓ̈ ϩⲓ̈ⲧⲟⲩⲱϥ ⲙⲡⲣⲏⲥ ⲛⲧⲉⲕⲕⲗⲏⲥⲓ̈ⲁ
ⲁⲩⲱ ϣⲁϥⲃⲱⲕ ϣⲁⲣⲟⲥ ⲛⲥⲉⲡⲥⲛⲁⲩ ⲙⲙⲏⲛⲉ ⲛϥϭⲙ ⲛⲉⲥϣⲓⲛⲉ
ⲛⲧⲟϥ ⲙⲛ ⲕⲉⲫⲓⲗⲟⲥⲟⲫⲟⲥ ϫⲉ ⲁⲡⲁ ⲙⲁⲣⲧⲏⲣⲓⲟⲛ. ⲁⲩⲱ ⲛⲉϣⲁϫⲉ
ⲛϣⲁⲣⲉ ⲡⲡⲉⲧⲟⲩⲁⲁⲃ ⲁⲡⲁ ⲡⲁⲙⲃⲱ ϫⲟⲟⲩ ⲛⲁⲥ. ⲛⲉϣⲁⲣⲉ ⲁⲡⲁ
ⲙⲁⲣⲧⲏⲣⲓⲟⲛ ϫⲟⲟⲩ ⲉⲣⲟⲥ ⲙⲙⲛⲧⲟⲩⲉⲓ̈ⲉⲛⲓⲛ. ⲉⲧⲃⲉ ⲛⲁⲓ̈ ⲣⲱ ⲁ
ⲧϣⲉⲉⲣⲉ ϣⲏⲙ ⲧⲥⲁⲃⲟⲥ ⲉⲧⲙⲛⲧⲣⲙⲛⲕⲏⲙⲉ. ⲙⲛⲛⲥⲁ ϣⲟⲙⲧⲉ
ⲇⲉ ⲛⲣⲟⲙⲡⲉ ⲉⲥⲟⲩⲏϩ ϩⲙ ⲡⲙⲁ ⲉⲧⲙⲙⲁⲩ ⲁ ⲡϫⲟⲉⲓⲥ ϭⲉⲗⲡ ⲡⲁⲓ̈
ⲉⲃⲟⲗ ⲉⲁⲡⲁ ⲡⲁⲙⲃⲱ ϫⲉ ⲟⲩⲥϩⲓⲙⲉ ⲧⲉ ⲁⲗⲗⲁ ⲙⲡⲉϥⲉⲓ̈ⲙⲉ ϫⲉ
ⲧϣⲉⲉⲣⲉ ⲙⲡⲣⲣⲟ ⲧⲉ. ⲛⲧⲉⲣⲉϥⲉⲓ̈ⲙⲉ ⲇⲉ ϫⲉ ⲟⲩⲥϩⲓⲙⲉ ⲇⲉ (sic)
ⲁϥϣⲁϫⲉ ⲛⲙⲙⲁⲥ ⲉϥϫⲱ ⲙⲙⲟⲥ ϫⲉ ⲙⲡⲉⲣⲧⲣⲉ ⲗⲁⲁⲩ ⲉⲓ̈ⲙⲉ ϫⲉ
ⲛⲧⲉ ⲟⲩⲥϩⲓⲙⲉ. ⲛⲟⲩϩⲱⲃ ⲅⲁⲣ ⲁⲛ ⲉϥϯⲕⲱⲧ ⲙⲡⲉⲛⲃⲓⲟⲥ ⲡⲉ
ⲉⲧⲣⲉⲩ (sic) ⲟⲩⲥϩⲓⲙⲉ ⲟⲩⲱϩ ϩⲛ ⲧⲛⲙⲏⲧⲉ ϫⲉⲕⲁⲥ ⲛⲛⲉ ⲗⲁⲁⲩ
ϯⲟⲥⲉ ⲛⲧⲛⲁⲫⲟⲣⲙⲏ. ⲙⲛⲛⲥⲁ ⲯⲓⲧⲉ ⲇⲉ ⲛⲣⲟⲙⲡⲉ ⲁⲩⲛⲁⲩ
ⲉⲧϣⲉⲉⲣⲉ ϣⲏⲙ ϫⲉ ⲙⲛ ⲙⲟⲣⲧ ⲙⲙⲟⲥ ⲁⲩⲱ ⲁⲩⲙⲟⲩⲧⲉ ⲉⲣⲟⲥ
ϫⲉ ϩⲗⲗⲁⲣⲓ̈ⲟⲛ ⲡⲉⲥⲓ̈ⲟⲩⲣ. ⲉⲡⲓⲇⲏ ⲉⲩⲉⲛ ϩⲁϩ ⲛⲣⲱⲙⲉ ϩⲙ ⲡⲉⲓⲥ-
ⲭⲏⲙⲁ ⲛⲧⲉⲓⲙⲓⲛⲉ : -- ⲉⲧⲃⲉ ⲛⲉⲥⲉⲕⲓⲃⲉ ⲇⲉ ⲟⲛ ϫⲉ ⲙⲡⲟⲩⲉⲣ
ⲑⲉ ⲛⲛⲁⲛⲉϩⲓⲟⲙⲉ ⲧⲏⲣⲟⲩ. ⲛϣⲟⲣⲡ ⲙⲉⲛ ⲁⲥϣⲟⲟⲩⲉ ϩⲓⲧⲛ
ⲧⲁⲥⲕⲩⲥⲓⲥ ⲁⲩⲱ ⲙⲡⲉⲥϩⲩⲡⲟⲅⲓⲥⲑⲉ ⲉⲡⲡⲁⲑⲟⲥ (?) ⲛⲛⲉϩⲓⲟⲙⲉ : --
ⲉⲡⲓⲇⲏ ⲁ ⲡⲛⲟⲩⲧⲉ ⲡⲡⲁⲛⲧⲟⲕⲣⲁⲧⲱⲣ ⲟⲩⲉϩⲥⲁϩⲛⲉ ⲛⲁⲥ ⲙⲡϩⲱⲃ
ⲉⲧⲧⲏϣ. ⲙⲙⲛⲥⲁ ⲯⲓⲧⲉ ⲇⲉ ⲛⲣⲟⲙⲡⲉ ⲉⲥϣⲟⲟⲡ ϩⲉⲛ ⲛⲉⲓ̈ⲛⲟϭ
ⲛⲛⲁⲥⲕⲩⲥⲓⲥ · ⲛⲉⲁⲩⲟⲩⲱ ⲅⲁⲣ ⲉⲩⲉⲓ ⲧⲟⲟⲧⲟⲩ ⲛⲥⲱⲥ ⲛϭⲓ
ⲛⲉⲥⲉⲓ̈ⲟⲧⲉ ϫⲉ ⲁⲥⲙⲟⲩ -- ⲁⲩⲇⲁⲓⲙⲱⲛ ⲇⲉ ⲟⲛ ϣ̄ϥ̄ ⲉϩⲟⲩⲛ
ⲉⲧⲉⲥⲕⲟⲩⲓ ⲛⲥⲱⲛⲉ ⲉⲧϩⲛ ⲕⲱⲥⲧⲁⲛⲧⲓⲛⲟⲩⲡⲟⲗⲓⲥ ⲁⲩⲱ ⲁⲩϫⲓⲧⲥ
ⲉⲣⲁⲧⲟⲩ ⲛⲛⲉⲛⲟϭ ⲛⲛⲁⲥⲕⲩⲧⲏⲥ ⲉⲧϩⲉⲛ ⲛⲉⲙⲟⲛⲁⲥⲧⲏⲣⲓ̈ⲟⲛ ⲙⲡⲃⲩ-
ⲥⲁⲛⲧⲓ̈ⲟⲛ ⲉⲧⲣⲉⲩϣⲗⲏⲗ ⲉϫⲱⲥ ⲁⲩⲱ ⲙⲡⲉ ⲡϫⲟⲉⲓⲥ ⲭⲁⲣⲓⲍⲉ ⲛⲁⲥ
ⲙⲡⲧⲁⲗϭⲟ ⲉⲃⲟⲗ ϩⲓⲧⲟⲟⲧⲟⲩ ⲁⲩⲥⲩⲙⲃⲟⲩⲗⲉⲩⲉ ⲙⲡⲣⲣⲟ ⲉⲃⲟⲗ ϩⲓⲧⲛ
ⲛⲉⲛⲟϭ ⲙⲡⲡⲁⲗⲗⲁⲧⲓⲟⲛ ⲉⲩϫⲱ ⲙⲙⲟⲥ ϫⲉ ⲡⲣⲣⲟ ⲱⲛϩ ϣⲁ ⲉⲛⲉϩ ·
ⲉϣϫⲉ ⲥⲉⲣⲁⲛⲁⲕ ⲙⲡⲉⲕⲣⲁⲧⲟⲥ (sic) ⲉϣⲱⲡ ⲉⲣⲟⲕ ⲙⲡⲉⲛϣⲁϫⲉ
ⲧⲉⲛⲟⲟⲩ ⲛⲧⲉⲕϣⲉⲉⲣⲉ ⲉϣⲓⲏⲧ ⲉⲣⲁⲧⲟⲩ ⲛⲛⲁⲥⲕⲩⲧⲏⲥ ⲉⲧϩⲙ
ⲛⲙⲁ ⲉⲧⲙⲙⲁⲩ · ϩⲉⲛⲛⲟϭ ⲅⲁⲣ ⲛⲉ ⲛⲉⲩⲡⲟⲗⲩⲧⲓⲁ :--- ⲁⲩⲱ
ⲧⲛⲡⲓⲥⲧⲉⲩⲉ ϫⲉ ⲡϭⲟⲉⲓⲥ ⲛⲁⲭⲁⲣⲓⲍⲉ ⲛⲁⲥ ⲙⲡⲧⲁⲗϭⲟ ⲉⲃⲟⲗ ϩⲓ-
ⲧⲟⲟⲧⲟⲩ -- ⲡⲣⲣⲟ ⲇⲉ ⲛⲧⲉⲣⲉϥⲥⲱⲧⲙ ⲉⲡⲉⲩϣⲟϫⲛⲉ ⲁϥⲣⲁϣⲉ
ⲉⲙⲁⲧⲉ ⲉⲡⲓⲇⲏ ⲟⲩⲛ ⲟⲩⲛⲟϭ ⲛⲙⲕⲁϩⲛϩⲏⲧ ϣⲟⲟⲡ ⲛⲁϥ ⲉⲧⲃⲉ
ⲧⲉϥϣⲉⲉⲣⲉ ⲁⲩⲱ ⲁϥⲧⲉⲛⲟⲟⲩ ⲛⲙⲙⲁⲥ ⲛⲥⲓⲟⲩⲣ ⲥⲛⲁⲩ . ⲁⲩⲱ
ⲥⲛⲧⲉ ⲙⲡⲁⲣⲑⲉⲛⲟⲥ . ⲙⲛ ⲕⲉϩⲙϩⲁⲗ ⲉⲧⲣⲉⲩϩⲩⲡⲉⲣⲉⲧⲉⲓ
ⲛⲁⲥ . ⲁϥⲥϩⲁⲓ ⲉⲣⲁⲕⲟⲧⲉ ⲉⲣⲁⲧϥ ⲙⲡⲉⲥⲧⲣⲁⲧⲏⲗⲁⲧⲏⲥ ⲙⲛ ⲡϩⲩ-
ⲅⲉⲙⲱⲛ ⲉⲧⲣⲉⲩⲡⲱⲧ ⲛⲙⲙⲁⲥ ⲉⲡⲧⲟⲟⲩ ⲙⲡϩⲟⲥⲙ̄ ⲡⲣⲣⲟ ⲇⲉ
ⲁϥⲥϩⲁⲓ ⲉⲣⲁⲧⲟⲩ ⲛⲛⲁⲥⲕⲓⲧⲏⲥ ⲉⲧϩⲛ ϣⲓⲏⲧ . ⲁϥⲁⲓⲧⲉⲓ ⲛⲛⲟⲩ-
ⲙⲉⲗⲁ ⲙⲛ ⲟⲩⲭⲁⲣⲧⲏⲥ ⲁϥⲥϩⲁⲓ ϩⲉⲛ ⲧⲉϥϭⲓϫ ⲙⲙⲓⲛ ⲙⲙⲟϥ ϫⲉⲕⲁⲥ
ⲛⲛⲉⲩⲥϩⲏ ⲟⲩϣⲁϫⲉ ⲉϥϫⲟⲥⲉ ⲉⲧⲉⲡⲓⲥⲧⲟⲗⲏ ⲕⲁⲧⲁ ⲡⲉⲧⲛⲣⲉⲡⲉⲓ
ⲛⲧⲙⲛⲧⲣⲣⲟ ⲛⲁⲓ ⲛⲉ ⲛⲉϣⲁϫⲉ ⲛⲑⲃⲃⲓⲟ ⲛⲧⲁϥⲥϩⲁⲓⲥⲟⲩ ⲉⲧⲉⲡⲓⲥ-
ⲧⲟⲗⲏ . ⲡⲉⲓⲉⲗⲁⲭⲓⲥⲧⲟⲥ ⲛⲣⲣⲟ ⲍⲏⲛⲱⲛ ⲡⲉ ⲛⲧⲁ ⲡⲛⲟⲩⲧⲉ ϯ
ⲛⲁϥ ⲙⲡⲧⲁⲓ̈ⲟ ⲛⲧⲙⲛⲧⲣⲣⲟ ⲡⲁⲣⲁ ⲡⲉϥⲉⲙⲡϣⲁ ⲉϥⲉⲥϩⲁⲓ̈ ⲉⲣⲁⲧⲟⲩ
ⲛⲛⲉⲥⲛⲏⲩ ⲛⲛⲉⲩⲥⲉⲃⲏⲥ ⲛϣⲟⲩⲙⲉⲣⲓⲧⲟⲩ ⲉⲧϣⲗⲏⲗ ⲉⲧϫⲙ (sic.)
ⲡⲕⲟⲥⲙⲟⲥ ⲧⲏⲣϥ ⲭⲁⲓⲣⲉⲧⲉ . ϩⲁⲑⲏ ⲙⲛ (sic) ⲛϩⲱⲃ ⲛⲓⲙ ⲛⲁⲥⲛⲏⲩ
ⲉⲧⲟⲩⲁⲁⲃ ϯⲡⲁⲣⲁⲕⲁⲗⲉⲓ ⲙⲙⲱⲧⲛ ⲧⲏⲣⲧⲛ ϩⲙ ⲡⲉⲭ̅ⲥ̅ ⲁⲩⲱ
ⲉϣϫⲉ ϯⲙⲡϣⲁ ϯⲁⲥⲡⲁⲍⲉ ⲛⲛⲉⲧⲛⲟⲩⲉⲣⲏⲧⲉ ⲉⲧⲟⲩⲁⲁⲃ ---
ⲙⲛⲛⲥⲱⲥ ϯⲧⲁⲙⲟ ⲙⲙⲱⲧⲛ ⲉⲛⲉⲛⲧⲁ ⲡⲛⲟⲩⲧⲉ ⲁⲁⲩ ⲛⲁⲓ̈ ⲉⲧⲃⲉ
ⲛⲁⲛⲟⲃⲉ · ⲟⲩⲛⲧⲁⲓ̈ ⲙⲙⲁⲩ ⲛϣⲉⲉⲣⲉ ⲥⲛⲧⲉ ⲛⲥϩⲓⲙⲉ · ⲉⲙⲉⲛⲧⲁⲓ
ⲛⲗⲁⲁⲩ ⲛⲥⲟⲗⲥⲗ̄ ⲙⲙⲁⲩ ⲛⲥⲁ ⲛⲧⲟⲟⲩ ⲛⲧⲥⲛⲧⲉ[·] ⲧⲛⲟϭ ⲇⲉ
ⲁⲥⲃⲱⲕ ⲛⲧⲟⲟⲧⲛ · ⲁⲩⲱ ⲛϯⲥⲟⲟⲩⲛ ⲁⲛ ϫⲉ ⲛⲧⲁ ⲟⲩ ϣⲱⲡⲉ
ⲙⲙⲟⲥ ⲕⲁⲛ ⲉϣϫⲉ ⲛⲧⲁⲥⲙⲟⲩ ϩⲛ ⲑⲁⲗⲁⲥⲥⲁ · ⲕⲁⲛ ⲉϣϫⲉ
ⲛⲧⲁⲩⲁⲓⲭⲙⲁⲗⲱⲧⲓⲍⲉ ||ⲙⲙⲟⲥ ϩⲓⲧⲛ ⲛⲛⲃⲁⲣⲃⲁⲣⲟⲥ · ⲕⲁⲛ ⲉϣϫⲉ
ⲛⲧⲁⲩⲧⲁⲣⲡⲥ(?) ϩⲓⲧⲛ ⲛⲉⲑⲩⲣⲓⲟⲛ · ⲉⲓⲉ ⲡⲁⲛⲧⲱⲥ ⲛⲧⲁⲥⲙⲟⲩ ϩⲛ
ⲑⲁⲗⲁⲥⲥⲁ ⲡⲗⲏⲛ ⲛⲑⲉ ⲛⲧⲁⲥⲙⲟⲩ ⲙⲙⲟⲥ ⲡⲛⲟⲩⲧⲉ ⲡⲉⲧⲥⲟⲟⲩⲛ ·
ⲁⲩⲱ ⲁⲩⲛⲟϭ ⲛϩⲏⲏⲃⲉ ϣⲱⲡⲉ ϩⲙ ⲡⲁⲏⲓ ϩⲓⲧⲙ ⲡⲥⲱⲕ ⲉⲃⲟⲗ
ⲛⲧⲉⲧⲙⲙⲁⲩ ϫⲉ ⲙⲡⲓϩⲉ ⲉⲡⲉⲥⲥⲱⲙⲁ ϩⲱⲗⲱⲥ ⲧⲁⲧⲱⲙⲥ ⲙⲙⲟϥ ·
ⲛⲧⲉⲣⲓⲥⲟⲗⲥⲗ̄ ⲛⲟⲩⲕⲟⲩⲓ̈ ϩⲁ ⲧⲉⲧⲙⲙⲁⲩ ⲉⲓϫⲱ ⲙⲙⲟⲥ ϫⲉ ⲙⲁⲣⲉ
ⲡⲟⲩⲱϣ ⲙⲡϫⲟⲉⲓⲥ ϣⲱⲡⲉ · ⲁ ⲕⲉⲉⲙⲕⲁϩⲛϩⲏⲧ ⲧⲁϩⲟⲓ̈ ⲉϥϩⲟⲟⲩ
ⲡⲁⲣⲁ ⲡⲁⲓ̈ --- ⲧⲕⲉⲟⲩⲉⲓ̈ ⲛⲧⲁⲓ̈ⲧⲁϫⲣⲟⲓ̈ ⲉϫⲱⲥ ⲉⲓϫⲱ ⲙⲙⲟⲥ
ⲙⲡϫⲟⲉⲓⲥ ϫⲉ ⲉⲓⲥ ⲧⲉⲓⲕⲉⲟⲩⲉⲓ ⲙⲁⲣⲉⲥⲱⲛϩ ⲙⲡⲉⲕⲙⲧⲟ ⲉⲃⲟⲗ ·
ⲁⲩⲇⲁⲓⲙⲱⲛ ⲟⲛ ϣϥ̄ ⲉϩⲟⲩⲛ ⲉⲣⲟⲥ · ⲧⲛϩⲁⲣⲉϩ ⲉⲣⲟⲥ ⲙⲡⲉϩⲟⲟⲩ
ⲙⲛ ⲧⲉⲩϣⲏ · ϩⲱⲥⲇⲉ ⲛⲧⲁϫⲟⲟⲥ ϫⲉ ϥⲥⲟⲧⲡ ⲛϭⲓ ⲡⲙⲟⲩ
ⲛⲧⲉⲧⲙⲙⲁⲩ ⲡⲁⲣⲁ ⲡⲱⲛϩ ⲛⲧⲁⲓ̈ · ⲁⲩⲥⲩⲙⲃⲟⲩⲗⲉⲩⲉ ⲛⲁⲓ̈ ϩⲓⲧⲛ
ⲛⲉⲛⲟϭ ⲙⲡⲡⲁⲗⲗⲁⲧⲓⲟⲛ ⲉⲧⲣⲁϫⲟⲟⲩⲥ ⲉⲣⲁⲧϥ ⲛⲧⲉⲧⲛⲙⲛⲧⲡⲉ-
ⲧⲟⲩⲁⲁⲃ · ⲧⲉⲛⲟⲩ ϭⲉ ⲡϫⲱⲕ ⲛⲧⲁⲡⲓⲥⲧⲓⲥ ⲧⲉ ⲧⲁⲓ̈ ϩⲛ ⲟⲩⲙⲉ
ϫⲉ ⲙⲡⲛⲟⲩⲧⲉ ⲛⲁⲥⲧⲉⲧⲏⲩⲧⲛ ⲉⲃⲟⲗ ⲁⲛ ϩⲙ ⲡⲉⲧⲉⲧⲛⲛⲁⲁⲓⲧⲉⲓ̈
ⲙⲙⲟϥ ⲉϣⲱⲡⲉ ⲉⲧⲉⲧⲛϣⲁⲛⲡⲁⲣⲁⲕⲁⲗⲉⲓ̈ ⲙⲡϫⲟⲉⲓⲥ ϥⲛⲁⲭⲁⲣⲓⲍⲉ
ⲙⲡⲧⲁⲗϭⲟ ⲛⲧⲁϣⲉⲉⲣⲉ ϩⲓⲧⲛ ⲛⲉⲧⲛϣⲗⲏⲗ ⲛⲁⲥⲛⲏⲩ · ⲟⲩϫⲁⲓ̈
ⲛⲁⲉⲓ̈ⲟⲧⲉ ⲉⲧⲟⲩⲁⲁⲃ · ⲛⲧⲉⲣⲉⲥⲉⲓ ⲇⲉ ⲉϩⲟⲩⲛ ⲉⲣⲁⲕⲟⲧⲉ · ⲁ
ⲡⲉⲥⲧⲣⲁⲧⲩⲗⲁⲧⲏⲥ · ⲙⲛ ⲡϩⲏⲅⲉⲙⲱⲛ ⲃⲱⲕ ⲛⲙⲙⲁⲥ ⲉϣⲓ̈ⲏⲧ ⲁⲩⲱ
ⲛⲧⲉⲣⲟⲩⲃⲱⲕ ϣⲁ ⲡⲡⲉⲧⲟⲩⲁⲁⲃ ⲁⲡⲁ ⲡⲁⲙⲃⲱ ⲁⲩϯ ⲛⲁϥ ⲛⲧⲉ-
ⲡⲓⲥⲧⲟⲗⲏ ⲙⲡⲣⲣⲟ · ⲁⲩⲱ ⲁϥⲡⲁⲣⲁⲕⲁⲗⲉⲓ ⲛⲛⲉⲥⲛⲏⲩ ⲧⲏⲣⲟⲩ
||ⲉⲧⲣⲉⲩϣⲗⲏⲗ ⲉϫⲱⲥ · ⲉϥϫⲱ ⲙⲙⲟⲥ ϫⲉ ⲙⲁⲣⲉⲛⲥⲟⲡⲥ ⲙⲡϫⲟⲉⲓⲥ
ⲛϥⲭⲁⲣⲓⲍⲉ ⲙⲡⲧⲁⲗϭⲟ ⲛⲧϣⲉⲉⲣⲉ ⲙⲡⲣⲣⲟ · ⲕⲁⲓ ⲅⲁⲣ ⲟⲩⲉⲩⲥⲉⲃⲏⲥ
ⲡⲉ ϩⲛ ϩⲱⲃ ⲛⲓⲙ ⲛⲧⲉⲣⲟⲩϩⲓⲧⲟⲟⲧⲟⲩ ⲇⲉ ⲉϣⲗⲏⲗ ⲁ ⲇⲁⲓⲙⲱⲛ
(sic) ϥⲟϭϥ ⲉϩⲟⲩⲛ ⲉⲣⲟⲥ · ⲁϥⲛⲟⲩϫⲉ ⲙⲙⲟⲥ ⲉϫⲙ ⲡⲕⲁϩ ·
ⲁϥϩⲓⲧⲉ ⲙⲙⲟⲥ ϩⲱⲥⲧⲉ ⲛⲧⲉ ⲛⲉⲥⲧⲣⲁⲧⲏⲗⲁⲧⲏⲥ ⲙⲛ ⲡϩⲏⲅⲉⲙⲱⲛ
ⲣϣⲡⲏⲣⲉ ϫⲉ ⲁϥϭⲙϭⲟⲙ ⲉⲃⲱⲕ ⲉϩⲟⲩⲛ ⲉⲣⲟⲥ ϩⲛ ⲧⲙⲏⲧⲉⲓ ⲛⲛⲉⲓ̈
ⲡⲉⲧⲟⲩⲁⲁⲃ ⲻ ⲧⲙⲁⲕⲁⲣⲓⲁ ⲇⲉ ϩⲗⲗⲁⲣⲓ̈ⲁ ⲛⲧⲉⲣⲉⲥⲛⲁⲩ ⲉⲧⲉⲥⲥⲱⲛⲉ
ⲛⲕⲟⲥⲙⲓⲕⲏ ⲁⲥⲥⲟⲩⲱⲛⲥ ⲁⲗⲗⲁ ⲙⲡⲉ ⲧⲥⲱⲛⲉ ⲛⲕⲟⲥⲙⲓⲕⲏ ⲥⲟⲩⲱⲛ
ⲧⲥⲱⲛⲉ ⲙⲡⲁⲣⲑⲉⲛⲟⲥ · ⲉⲥⲛⲁⲥⲟⲩⲱⲛⲉⲥ ⲛⲁϣ ⲛϩⲉ? ⲉⲡⲓⲇⲏ
ⲁ ⲛⲉⲥⲥⲁⲣⲝ ϣⲟⲟⲩⲉ ϩⲓⲧⲛ ⲧⲁⲥⲕⲩⲥⲓⲥ · ⲁⲩⲱ ⲁ ⲡⲥⲁ ⲙⲡⲉⲥ-
ⲥⲱⲙⲁ ϣⲓⲃⲉ ⲙⲛ ⲡⲉⲥⲥⲙⲟⲧ ⲉⲛⲉⲙⲛ ⲗⲁⲁⲩ ⲛϩⲏⲧⲥ ⲛⲥⲁ
ⲡⲕⲁⲥ ⲙⲛ ⲛϣⲁⲁⲣ · ⲉϫⲉⲛ ⲛⲁⲓ̈ ⲇⲉ ⲧⲏⲣⲟⲩ ⲛⲉⲥⲫⲟⲣⲉⲓ ⲛⲟⲩⲥ-
ⲭⲏⲙⲁ ⲛϩⲟⲟⲩⲧ · ⲛⲧⲉⲣⲉⲥⲛⲁⲩ ⲇⲉ ⲉⲧⲉⲥⲥⲱⲛⲉ ⲁⲥⲙⲕⲁϩⲛϩⲏⲧ
ⲁⲩⲱ ⲁ ⲡⲉⲥⲥⲁ ⲛϩⲟⲩⲛ ϣⲧⲟⲣⲧⲣ ⲉⲧⲃⲉ ⲧⲉⲥⲥⲱⲛⲉ · ⲁⲥⲡⲁϩⲧⲥ
ⲉϫⲙ ⲡⲕⲁϩ ⲁⲥⲣⲓⲙⲉ · ϩⲱⲥⲇⲉ ⲛⲥϩⲉⲣⲡ ⲡⲕⲁϩ ϩⲛ ⲛⲉⲥⲣⲙⲉⲓ̈ⲟⲟⲩⲉ
ⲉⲥϫⲱ ⲙⲙⲟⲥ ϫⲉ ⲡϫⲟⲉⲓⲥ ϣⲁⲛϩⲧⲏⲕ ϩⲁ ⲧⲉⲓⲕⲟⲩⲓ̈ ⲛϣⲉⲉⲣⲉ --
ⲛⲉⲥⲛⲏⲩ ⲇⲉ ⲛⲧⲉⲣⲟⲩⲛⲁⲩ ⲉⲣⲟⲥ ⲁⲩⲣϣⲡⲏⲣⲉ ⲉϫⲙ ⲡⲉⲥⲙⲕⲁϩⲛϩⲏⲧ
ⲁⲗⲗⲁ ⲙⲡⲟⲩⲉⲓ̈ⲙⲉ ⲉϩⲱⲃ ⲛⲧⲉⲓⲙⲓⲛⲉ ⲁⲗⲗⲁ ⲛⲉⲩϫⲱ ⲙⲙⲟⲥ ϫⲉ
ϥϣⲟⲟⲡ (sic) ϩⲛ ⲟⲩⲙⲛⲧϣⲉⲛϩⲧⲏϥ ⲉϩⲟⲩⲛ ⲉⲣⲟⲥ · ⲛⲧⲉⲣⲉⲥⲙⲧⲟⲛ
ⲇⲉ ⲛⲟⲩⲕⲟⲩⲓ̈ ⲉⲃⲟⲗ ϩⲙ ⲡϩⲓⲥⲉ ⲙⲡⲇⲁⲓⲙⲱⲛ|| ⲁ ⲡⲡⲉⲧⲟⲩⲁⲁⲃ
ⲁⲡⲁ ⲡⲁⲙⲃⲱ ⲙⲟⲩⲧⲉ ⲉⲩⲁⲥⲕⲓ̈ⲧⲏⲥ ⲛⲛⲁⲣⲭⲁⲓⲟⲥ ⲡⲉϫⲁϥ ⲛⲁϥ ϫⲉ
ϫⲓ ⲛⲧⲉⲓ̈ⲕⲟⲩⲓ̈ ⲛϣⲉⲉⲣⲉ ⲉϩⲟⲩⲛ ⲉⲡⲉⲕⲙⲁ ⲛϣⲱⲡⲉ · ⲛⲅϣⲗⲏⲗ
ⲉϫⲱⲥ ϣⲁⲛⲧⲉ ⲡϫⲟⲉⲓⲥ ⲭⲁⲣⲓⲍⲉ ⲛⲁⲥ ⲙⲛⲧⲁⲗϭⲟ -- ⲛⲧⲟϥ
ⲇⲉ ⲡⲉϫⲁϥ ⲛⲁϥ ϫⲉ ⲙⲡⲁϯⲡⲱϩ ⲉⲛⲉⲓ̈ϣⲓ ⲛⲧⲉⲓϭⲟⲧ ⲉⲧⲣⲁϫⲓ
ⲥϩⲓⲙⲉ ⲉϩⲟⲩⲛ ⲉⲡⲁⲙⲁ ⲛϣⲱⲡⲉ . ⲡⲉⲓ̈ϩⲱⲃ ⲡⲁⲓ̈ ⲡⲁϩⲉⲛⲣⲱⲙⲉ
ⲛⲁⲧⲡⲁⲑⲟⲥ ⲛⲉ (sic) ⲡⲉⲫⲓⲗⲟⲥⲟⲫⲟⲥ ⲇⲉ ⲁⲡⲁ ⲙⲁⲣⲧⲏⲣⲓⲟⲛ ⲡⲉ-
ϫⲁϥ ϫⲉ ⲧⲁⲁⲥ ⲛⲉⲗⲗⲁⲣⲓⲟⲛ ⲛⲉⲥⲓ̈ⲟⲩⲣ. ⲛⲧⲟϥ ⲅⲁⲣ ⲡⲉⲧⲉⲩⲟⲩⲛ
(sic) ϣϭⲟⲙ ⲙⲙⲟϥ ⲉϫⲓ ⲥϩⲓⲙⲉ ⲉϩⲟⲩⲛ ⲉⲡⲉϥⲙⲁ ⲛϣⲱⲡⲉ ⲁⲩⲱ
ⲁϥϯ ⲛⲧⲕⲟⲩⲓ̈ ⲛϣⲉⲉⲣⲉ ⲛⲧⲟⲟⲧⲥ ⲛⲧⲉⲥⲥⲱⲛⲉ. ⲁⲥϫⲓⲧⲥ ⲉϩⲟⲩⲛ
ⲉⲡⲉⲥⲙⲁ ⲛϣⲱⲡⲉ -- ⲉⲥϣⲁⲛⲧⲱⲟⲩⲛ ⲉϣⲗⲏⲗ ⲛⲉϣⲁⲥϣⲗⲏⲗ ⲛⲙⲙⲁⲥ
ⲉⲥϣⲁⲛϭⲱϣⲧ ⲉϩⲟⲩⲛ ⲉϩⲣⲁⲥ ϣⲁⲣⲉ ⲡⲉⲥⲥⲁ ⲛϩⲟⲩⲛ ⲃⲱⲗ ⲉⲃⲟⲗ --
ϣⲁⲥⲡⲁϩⲧⲥ ⲉϫⲙ ⲡⲕⲁϩ ⲛⲥⲣⲓⲙⲉ ϣⲁⲛⲧⲉⲥϩⲉⲣⲡ ⲡⲕⲁϩ ϩⲛ ⲛⲉⲥⲣ-
ⲙⲉⲓ̈ⲟⲟⲩⲉ -- ⲉⲥϣⲁⲛⲧⲱⲟⲩⲛ ⲇⲉ ⲟⲛ ϣⲁⲥϩⲟⲗϭ ⲉϩⲟⲩⲛ ⲉⲣⲟⲥ
ⲛⲥϯⲡⲉⲓ̈ ⲉⲣⲱⲥ . ϩⲉⲛⲥⲟⲡ ⲇⲉ ⲟⲛ ϣⲁⲥⲉⲛⲕⲟⲧⲕ ϩⲓϫⲉⲛ ⲟⲩⲡⲟⲓ̈
ⲛⲟⲩⲱⲧ ⲛⲙⲙⲁⲥ ⲛⲧⲉⲩϣⲏ ⲣⲏⲣⲥ (sic) ⲁⲩⲱ ⲙⲛⲛⲥⲁ ⲥⲁϣϥ ⲇⲉ
ⲛϩⲟⲟⲩ ⲁ ⲡϫⲟⲉⲓⲥ ⲭⲁⲣⲓⲍⲉ ⲛⲁⲥ ⲡⲧⲁⲗϭⲟ (sic) ⲁⲥⲉⲛⲧⲥ ⲉⲧⲙⲏⲧ (sic)
ⲛⲧⲉⲕⲕⲗⲏⲥⲓⲁ ⲡⲉϫⲁⲥ ⲛⲛⲉⲥⲛⲏⲩ ϫⲉ ϩⲓⲧⲛ ⲛⲉⲧⲛϣⲗⲏⲗ ⲉⲧⲟⲩⲁⲁⲃ ⲁ
ⲡϫⲟⲉ(sic) ⲭⲁⲣⲓⲍⲉ ⲙⲛⲧⲁⲗϭⲟ ⲛⲧϣⲉⲉⲣⲉ ⲙⲡⲣⲣⲟ . ⲡⲉⲥⲧⲣⲁⲧⲩ-
ⲗⲁⲧⲏⲥ ⲇⲉ ⲙⲛ ⲡϩⲩⲅⲉⲙⲱⲛ ⲁⲩⲥⲩⲛⲁⲅⲉ ϩⲁϩⲧⲏⲛ (sic) ⲛⲧⲕⲏⲣⲓⲁⲕⲏ
ⲁⲩⲱ ⲁⲩⲕⲟⲧⲟⲩ ⲉⲧⲣⲉⲩⲃⲱⲕ ⲉⲧⲉⲩⲡⲁⲧⲣⲓⲥ ⲛⲉⲥⲛⲏⲩ ⲇⲉ ⲧⲏⲣⲟⲩ
ⲉⲧϩⲉⲛ ϣⲓ̈ⲏⲧ ⲁⲩ||ⲥϩⲁⲓ ⲛⲛⲟⲩⲉⲡⲓⲥⲧⲟⲗⲏ ⲉⲃⲟⲗ ϩⲓⲧⲟⲟⲧⲥ ⲛⲧϣⲉⲉⲣⲉ
ⲙⲡⲣⲣⲟ ϣⲁ ⲡⲉⲥⲉⲓⲱⲧ ⲉⲥⲥⲏϩ ⲙⲡⲉⲓⲧⲩⲡⲟⲥ -- ⲛⲉⲓⲉⲗⲁⲭⲓⲥⲧⲟⲥ
ⲉⲧϩⲙ ⲡⲧⲟⲟⲩ ⲙⲡϩⲟⲥⲙ ⲉⲩⲥϩⲁⲓ ⲉⲣⲁⲧϥ ⲙⲡⲣⲉϥϫⲣⲟ ⲛⲁⲩⲅⲟⲩⲥⲧⲟⲥ
ⲡⲁⲡⲁⲙⲁϩⲧⲉ ⲉⲧⲧⲁⲓⲏⲩ ⲛⲣⲣⲟ ⲍⲏⲛⲱⲛ . ϩⲁⲑⲏ ⲙⲉⲛ ⲙⲡϣⲁϫⲉ
ⲧⲛⲟⲩⲱϣⲧ ⲙⲡⲉⲕⲣⲁⲧⲟⲥ ⲉⲧⲧⲁⲓⲏⲩ . ⲡⲛⲟⲩⲧⲉ ϥⲣϫⲓⲥⲉ
ⲙⲡⲉⲕⲑⲣⲟⲛⲟⲥ . ⲁⲩⲱ ⲛϥϩⲁⲣⲉϩ ⲉⲧⲉⲕⲙⲛⲧⲉⲣⲟ ⲛⲑⲉ ⲛⲇ̅ⲁ̅ⲇ̅ .
ⲙⲛ ⲥⲟⲗⲟⲙⲱⲛ ⲙⲛ ⲉⲍⲉⲕⲓⲁⲥ ⲙⲛ ⲓⲱⲥⲓⲁⲥ . ⲁⲩⲱ ⲛϥⲇⲓⲏⲕⲉⲓ
ⲛⲧⲉⲕⲙⲛⲧⲣⲣⲟ ⲁϫⲛ ⲗⲁⲁⲩ ϩⲓ ⲧⲁⲣⲁⲭⲏ. ⲟⲩϫⲁⲓ̈ ϩⲙ
ⲡϫⲟⲉⲓⲥ ⲉⲕϥⲓⲣⲟⲟⲩϣ ϩⲁⲣⲟⲛ ⲁⲩⲱ ⲧⲉⲕⲕⲗⲏⲥⲓⲁ ⲧⲏⲣⲥ. ⲁⲩⲱ
ⲛⲧⲉⲓ̈ϩⲉ ⲁⲩⲉⲓ ⲉⲕⲱⲥⲧⲧⲁⲛⲧⲓⲛⲟⲩⲡⲟⲗⲓⲥ ⲁⲩⲛⲟϭ ⲛⲣⲁϣⲉ ϣⲱⲡⲉ
ⲉϫⲙ ⲡⲧⲁⲗϭⲟ ⲛⲧϣⲉⲉⲣⲉ ⲙⲡⲣⲣⲟ · ⲁⲩⲱ ⲁ ⲡⲣⲣⲟ ⲉⲉⲓⲣⲉ (sic)
ⲛⲟⲩⲁⲣⲓⲥⲧⲟⲛ ⲉⲛⲉϭⲱⲃ ⲧⲏⲣⲟⲩ ⲛⲧⲁϥϩⲉ ⲉⲣⲟⲟⲩ ϩⲛ ⲧⲡⲟⲗⲓⲥ ⲙⲛ
ⲛⲉⲧⲟ ⲛϭⲁⲗⲏ ⲙⲛ ⲟⲩⲟⲛ ⲛⲓⲙ ⲉⲧⲟ ⲛϣϭⲁ ϩⲙ ⲡⲉⲩⲥⲱⲙⲁ · ⲛⲉϥⲁϩⲉ
ⲇⲉ ⲉⲣⲁⲧϥ ⲛϭⲓ ⲡⲣⲣⲟ ⲉϥⲙⲏⲣ ⲉϥⲇⲓⲁⲕⲟⲛⲉⲓ ⲉⲣⲟⲟⲩ · ⲉⲁϥϯ
ⲛⲟⲩⲕⲣⲁⲥⲓⲥ ⲛⲕⲟⲛⲧⲓⲧⲟⲛ ⲙⲡⲟⲩⲁⲡⲟⲩⲁ ⲙⲙⲟⲟⲩ ϩⲛ ⲧⲉϥϭⲓϫ ·
ⲙⲛ ϣⲟⲙⲛⲧⲉ ⲛⲛⲟⲙⲓⲥⲙⲁ ⲉⲧϭⲓϫ ⲙⲡⲟⲩⲁⲡⲟⲩⲁ ⲙⲡⲉϥⲣⲁⲥⲧⲉ
ⲇⲉ ⲁϥⲉⲓⲣⲉ ⲛⲟⲩⲁⲣⲓⲥⲧⲟⲛ ⲉⲛⲛⲟϭ ⲙⲡⲡⲁⲗⲗⲁⲧⲓⲟⲛ ⲧⲏⲣⲟⲩ ·
ⲁⲩⲱ ⲛⲉϥⲣⲁϣⲉ ⲙⲙⲁⲧⲉ (sic) ⲉϫⲙ ⲡⲧⲁⲗϭⲟ ⲛⲧⲁϥϣⲱⲡⲉ ⲛⲧⲉϥ-
ϣⲉⲉⲣⲉ ⲁⲩⲱ ⲛⲧⲉⲣⲉϥϫⲛⲉ ⲧⲉϥϣⲉⲉⲣⲉ ⲉϥϫⲱ ⲙⲙⲟⲥ ϫⲉ ⲟⲩ
ⲡⲉ ⲛⲧⲁϥϣⲱⲡⲉ ⲙⲙⲟ, ⲧⲁϣⲉⲉⲣⲉ · ⲛⲧⲟⲥ ⲇⲉ ⲡⲉϫⲁⲥ|| ⲛⲁϥ ϫⲉ
ⲁⲩⲧⲁⲁⲧ ⲉⲧⲟⲟⲧϥ ⲛⲛⲟⲩⲁⲥⲕⲓ̈ⲧⲏⲥ ⲉⲡⲉϥⲣⲁⲛ ⲡⲉ ⲡⲁⲥⲟⲛ ⲉⲗ-
ⲗⲁⲣⲓ̈ⲟⲛ · ⲡⲉⲧⲙⲙⲁⲩ ⲁϥϣⲗⲏⲗ ⲉϫⲱⲓ̈ ⲁ ⲡϫⲟⲉⲓⲥ ⲭⲁⲣⲓⲍⲉ ⲛⲁⲓ
ⲙⲡⲧⲁⲗϭⲟ ϩⲓⲧⲛ ⲛⲉϥϣⲗⲏⲗ --- ⲟⲩⲛⲟϭ ⲧⲉ ⲧⲉϥⲙⲛⲧϣⲁⲛϩⲧⲏϥ
ⲉϩⲟⲩⲛ ⲉⲣⲟⲓ̈ · ⲟⲩⲙⲏⲏϣⲉ ⲅⲁⲣ ⲛⲥⲟⲡ ϣⲁϥⲁⲥⲡⲁⲍⲉ ⲙⲙⲟⲓ̈ ⲉⲧⲁ-
ⲧⲁⲡⲣⲟ · ϩⲉⲛⲥⲟⲡ ⲇⲉ ⲟⲛ ϣⲁϥⲉⲛⲕⲟⲧⲕ ⲛⲙⲙⲁⲓ̈ ϩⲛ ⲟⲩⲡⲟⲓ̈
ⲛⲟⲩⲱⲧ ⲛⲧⲉⲩϣⲏ ⲧⲏⲣⲥ --- ⲡⲣⲣⲟ ⲇⲉ ⲛⲧⲉⲣⲉϥⲥⲱⲧⲙ ⲉⲛⲁⲓ̈
ⲁ ⲡϩⲱⲃ ϣⲱⲡⲉ ⲉϥϩⲟⲣϣ ⲛⲁϩⲣⲁϥ :--- ⲡⲉϫⲁϥ ϫⲉ ⲙⲡⲓⲥⲱⲧⲙ
ⲉⲛⲉϩ ϫⲉ ϣⲁⲣⲉ ⲙⲟⲛⲁⲭⲟⲥ ⲁⲥⲡⲁⲍⲉ ⲛⲥϩⲓⲙⲉ · ⲏ ⲛϥ̄ⲉⲛⲕⲟⲧⲕ
ϩⲓϫⲛ ⲟⲩⲡⲟⲓ̈ ⲛⲛⲟⲩⲱⲧ ⲛⲙⲙⲁⲥ --- ⲁⲗⲗⲁ ⲛϣⲁⲓⲥⲱⲧⲙ ϫⲉ
ⲥⲉⲙⲟⲥⲧⲉ ⲙⲡⲉⲓⲅⲉⲛⲟⲥ ϫⲉ ⲥϩⲓⲙⲉ · ⲉⲧⲃⲉ ⲡⲁⲓ ⲣⲱ ⲛⲉⲩⲃⲏⲕ
ⲉⲡϫⲁⲓ̈ⲉ ⲁⲩⲱ ϫⲉ ⲙⲉⲩⲁⲛⲓ̈ⲭⲉ ⲣϣⲁϫⲉ ⲛⲙⲙⲁⲩ ⲉⲡⲧⲏⲣϥ · ⲁⲩⲱ
ⲛⲉⲣⲉ ⲡⲉⲓ̈ⲙⲉⲉⲩⲉ ⲡⲁⲓ̈ ϣⲧⲟⲣⲧⲣ ⲙⲙⲟϥ ⲧⲟⲧⲉ ⲡⲣⲣⲟ ⲁϥⲥϩⲁⲓ̈
ⲛⲧⲙⲉϩⲥⲛⲧⲉ ⲛⲉⲡⲓⲥⲧⲟⲗⲏ ⲉϣⲓⲏⲧ ⲛⲧⲉⲓϩⲉ. ⲡⲁⲩⲅⲟⲩⲥⲧⲟⲥ ⲛⲣⲉ-
ϥϫⲣⲟ ⲍⲏⲛⲱⲛ ⲉϥⲥϩⲁⲓ̈ ⲉⲣⲁⲧⲟⲩ ⲛⲛⲉⲛⲛⲉⲓⲟⲧⲉ (sic) ⲉⲧⲟⲩⲁⲁⲃ
ⲛⲉⲩⲥⲉⲃⲏⲥ ⲉⲧⲟⲩⲏϩ ϩⲛ ϣⲓⲏⲧ · ϩⲉ ϯϣⲉⲡϩⲙⲟⲧ ⲛⲧⲛ ⲛⲉⲧⲛϣ-
ⲗⲏⲗ --- ⲁⲩⲱ ⲙⲛ ϭⲟⲙ ⲙⲙⲟⲓ̈ ⲉⲙⲉϩ ⲡⲉⲭⲣⲉⲱⲥ ⲉⲧⲉⲣⲟⲓ̈ ⲛⲧⲟⲟⲧϥ
ⲛⲧⲉⲧⲛⲙⲛⲧⲛⲉⲧⲟⲩⲁⲁⲃ ⲉⲧⲉ ⲡⲉϩⲙⲟⲧ ⲡⲉ ⲛⲧⲁ ⲡⲛⲟⲩⲧⲉ
ⲁⲁϥ ⲛⲙⲙⲁⲓ̈ ⲉⲃⲟⲗ ϩⲓ̈ⲧⲟⲟⲧⲟⲩ ⲛⲛⲉⲧⲛϣⲗⲏⲗ ϯⲟⲩⲱϣ ⲟⲩⲛ
ⲉⲧⲣⲉⲧⲉⲧⲛϣⲱⲡ ⲉⲣⲱⲧⲛ ⲙⲡⲁⲧⲱϩⲃ̄ (sic) ⲛⲧⲉⲧⲛⲟⲟⲩ (sic) ⲛⲁⲓ̈
ⲙⲡⲁⲥⲟⲛ ⲉⲗⲗⲁⲣⲓⲟⲛ ϫⲉ ⲟⲩⲉⲛ ⲟⲩⲛⲟϭ ⲛⲣⲱⲙⲉ ϣⲱⲛⲉ ϩⲙ
ⲡⲡⲁⲗⲗⲁⲧⲓⲟⲛ · ||ⲁⲩⲱ ⲙⲛ ϣϭⲟⲙ ⲙⲙⲟϥ ⲉⲡⲏⲣⲁⲛ ⲑⲁⲗⲁⲥⲥⲁ ⲉⲧⲃⲉ
ⲡⲁϣⲁⲓ̈ ⲙⲡϣⲱⲛⲉ ⲉⲧϩⲓϫⲱϥ --- ⲁⲓⲥⲱⲧⲙ ⲅⲁⲣ ⲉⲡϣⲉⲛⲟⲩϥⲉ
ⲛⲧⲉϥⲙⲛⲧⲛⲉⲧⲟⲩⲁⲁⲃ · ⲁⲩⲱ ϯⲡⲓⲥⲧⲉⲩⲉ ϫⲉ ⲉϥϣⲁⲛⲉⲓ̈ ϣⲁⲣⲟⲛ
ⲧⲛⲛⲁϭⲉⲛϩⲏⲩ ⲧⲏⲣⲛ ϩⲓⲧⲛ ⲛⲉϥϣⲗⲏⲗ · ⲛⲧⲉⲣⲟⲩⲥⲱⲧⲙ ⲇⲉ
ⲉⲧⲉⲡⲓⲥⲟⲧⲟⲗⲏ ⲙⲡⲣⲣⲟ ⲁϥⲙⲟⲩⲧⲉ (sic) ⲉⲧⲙⲁⲕⲁⲣⲓⲁ ϩⲗⲗⲁⲣⲓⲁ ⲡⲉϫⲁⲩ
ⲛⲁⲥ ϫⲉ ⲁⲣⲓ ⲡⲉⲕⲣⲟⲟⲩϣ ⲱ̅ ⲡⲥⲟⲛ ϫⲉ ⲁ ⲡⲣⲣⲟ ⲧⲛⲛⲛⲟⲩ
ⲛⲥⲱⲕ --- ⲧⲙⲁⲕⲁⲣⲓ̈ⲁ ⲇⲉ ϩⲗⲗⲁⲣⲓⲁ ⲁⲥⲙⲕⲁϩⲛϩⲏⲧ ⲉⲙⲁⲧⲉ ·
ⲛⲉⲥⲛⲏⲩ ⲇⲉ ⲁⲩⲥⲗⲥⲱⲗⲥ̄ ⲉⲩϫⲱ ⲙⲙⲟⲥ ϫⲉ ⲧⲱⲟⲩⲛ ⲛⲅⲃⲱⲕ
ⲱ̅ ⲡⲥⲟⲛ ⲡϫⲟⲉⲓⲥ ⲛⲁⲃⲱⲕ ⲛⲙⲙⲁⲕ ⲛϥⲥⲧⲟⲕ ϩⲛ ⲟⲩⲉⲓⲣⲏⲛⲏ ·
ⲁⲩⲧⲉⲛⲟⲟⲩ ⲛⲙⲙⲁⲥ ⲛⲕⲉⲥⲟⲛ ⲥⲛⲁⲩ ⲉⲁⲩⲣⲛⲟϭ ϩⲉⲛ ⲑⲩⲗⲩⲅⲓⲁ ·
ⲁⲩⲱ ⲧⲁⲓ ⲧⲉ ⲑⲉ ⲛⲧⲁⲩⲉⲓ̈ ⲉⲕⲟⲥⲧⲁⲛⲧⲓⲛⲟⲩⲡⲟⲗⲓⲥ · ⲡⲣⲣⲟ ⲇⲉ
ⲛⲧⲉⲣⲉϥⲥⲱⲧⲙ ϫⲉ ⲁⲩⲉⲓ̈ ⲁϥⲣⲁϣⲉ ⲉⲙⲁⲧⲉ · ⲁϥⲟⲩⲉϩⲥⲁϩⲛⲉ
ⲉⲧⲣⲟⲩⲉⲛⲧⲟⲩ ⲉϩⲟⲩⲛ ⲛⲁϥ ϩⲉⲛ ⲟⲩⲛⲟϭ ⲛⲣⲁϣⲉ ⲙⲛ ⲟⲩⲉⲟⲟⲩ ·
ⲁⲩⲱ ⲁϥⲉⲓ ⲉⲃⲟⲗ ϩⲁ ⲧⲉⲩϩⲉ ϣⲁ ⲡⲙⲉϩϣⲟⲙⲛⲧ ⲛⲣⲟ ⲙⲡⲡⲁⲗ-
ⲗⲁⲧⲓⲟⲛ · ⲁϥϩⲟⲗϭ ⲉϩⲟⲩⲛ ⲉⲣⲟⲟⲩ ⲁⲩⲱ ⲁϥϯⲡⲓ ⲉϫⲛ ⲧⲉⲩⲁⲡⲉ ·
ⲁⲩⲱ ⲛⲧⲉⲣⲟⲩⲃⲱⲕ ⲉϩⲟⲩⲛ ⲁϥⲧⲣⲟⲩⲉⲓ̈ⲛⲉ ⲛϩⲉⲛⲥⲩⲙⲯⲉⲗⲓⲟⲛ
ⲉⲩϭⲟⲟⲗⲉ ⲛϩⲁⲧ ⲁϥⲕⲁⲁⲩ ϩⲁⲣⲟⲟⲩ · ⲁⲩⲱ ⲁⲩϩⲙⲟⲟⲥ ⲁⲩϣⲁϫⲉ
ⲛⲙⲙⲁϥ ϩⲉⲛ ⲧⲉⲅⲣⲁⲫⲏ ⲁⲩⲱ ⲛⲉϥⲥⲱⲧⲙ ⲉⲣⲟⲟⲩ ϩⲉⲛ ⲟⲩⲧⲱⲧ
ⲛϩⲏⲧ ⲁⲩⲱ ⲛⲉϥⲡⲁⲣⲁⲕⲁⲗⲉⲓ ⲙⲙⲟⲟⲩ ⲉϥϫⲱ ⲙⲙⲟⲥ ϫⲉ ϣⲗⲏⲗ
ⲉϫⲱⲓ̈ ⲛⲧⲉ ⲡϫⲟⲉⲓⲥ ϩⲁⲣⲉϩ ⲉⲣⲟⲓ̈ ϩⲉⲛ ⲧⲡⲓⲥⲧⲓⲥ ⲛⲛⲁⲉⲓ̈ⲟⲧⲉ ---
ⲁⲩⲱ ⲁϥⲧⲱⲟⲩⲛ ⲁϥⲥⲉⲕ ⲧⲙⲁⲕⲁⲣⲓⲁ ϩⲗⲗⲁⲣⲓⲁ ⲛⲥⲁ ⲟⲩⲥⲁ ⲙⲁⲩⲁⲁⲥ
ⲁϥϣⲁϫⲉ ⲛⲙⲙⲁ (sic) ⲉϥϫⲱ ⲙⲙⲟⲥ ϫⲉ ⲡⲁⲉⲓⲱⲧ ⲉⲗⲗⲁⲣⲓⲟⲛ ϯⲣⲭⲣⲓⲁ
ⲛⲛⲉⲕϣⲗⲏⲗ ϯⲟⲩⲱϣ ⲉϫⲛⲟⲩⲕ ⲉⲩϣⲁϫⲉ ⲙⲟⲛⲟⲛ ⲙⲡⲣϯⲟⲥⲉ ·
ⲁⲥϫⲟⲟⲥ ⲅⲁⲣ ⲛⲁⲓ̈ ⲛϭⲓ ⲧⲁϣⲉⲉⲣⲉ ϫⲉ ϩⲁϩ ⲛⲥⲟⲡ ϣⲁⲕⲁⲥⲡⲁⲍⲉ
ⲛⲧⲁⲧⲁⲡⲣⲟ ⲁⲩⲱ ϫⲉ ϣⲁⲕⲉⲛⲕⲟⲧⲕ ϩⲓϫⲛ ⲟⲩⲡⲟⲓ̈ ⲛⲟⲩⲱⲧ
ⲛⲙⲙⲁⲓ̈ ⲛⲧⲉⲩϣⲏ ⲧⲏⲣⲥ --- ⲙⲁⲧⲁⲙⲟⲓ̈ ⲉⲧⲙⲉ ϫⲉ ⲉⲕⲉⲓⲣⲉⲓ̈
(sic) ⲙⲡⲁⲓ̈ ⲉⲧⲃⲉ ⲟⲩⲙⲛⲧϣⲉⲛϩⲧⲏϥ ⲉϩⲟⲩⲛ ⲉⲣⲟⲥ --- ϯⲟⲩⲱϣ
ⲉⲉⲓ̈ⲙⲉ ⲉⲧⲙⲉ ϫⲉⲕⲁⲥ ⲉⲓ̈ⲉⲕⲁⲑⲁⲣⲓⲍⲉ ⲉⲃⲟⲗ ϩⲙ ⲡⲉϫⲣⲟⲡ · ⲛⲧⲟⲕ
ϩⲱⲱⲕ ⲙⲡⲉⲣϯⲟⲥⲉ ⲉⲧⲃⲉ ⲡϣⲁϫⲉ · ⲧⲡⲁⲣⲑⲉⲛⲟⲥ ⲇⲉ ⲉⲧⲟⲩⲁⲁⲃ
ⲁⲥⲙⲉⲕⲙⲟⲩⲕ̅ⲥ̅ ⲉⲥϫⲱ ⲙⲙⲟⲥ ϫⲉ ϯⲟⲩⲱϣ ⲉϩⲏⲡ ⲡϣⲁϫⲉ ·
ⲁⲗⲗⲁ ϫⲉ ⲛⲛⲉ ⲡⲕⲉⲥⲉⲉⲡⲉ ⲛⲛⲉⲙⲟⲛⲁⲭⲟⲥ ϯⲟⲥⲉ ⲛⲧⲁⲁⲫⲟⲣⲙⲏ ·
ⲉⲧⲣⲉⲩⲙⲉⲉⲩⲉ ⲉⲩⲧⲱⲗⲙ ⲛⲧⲉⲓⲙⲓⲛⲉ ⲉϩⲟⲩⲛ ⲉⲛⲉⲧⲟⲩⲁⲁⲃ · ⲁⲩⲱ
ⲡⲉϫⲁⲥ ⲛⲁϥ ϫⲉ ⲁⲛⲓ̈ⲛⲉ ⲛⲁⲓ̄ ⲙⲡⲉϥⲧⲟⲟⲩ ⲛⲛⲉⲩⲁⲅⲅⲉⲗⲓⲟⲛ ⲉⲡⲓⲙⲁ
--- ⲛⲅⲱⲣⲕ ⲛⲁⲓ̈ ϫⲉ ⲛⲅⲛⲁⲟⲩⲉⲛϩ ⲡϩⲱⲃ ⲉⲃⲟⲗ ⲁⲛ · ⲟⲩⲇⲉ
ⲛⲅⲛⲁⲕⲱⲗⲩ ⲙⲙⲟⲓ̈ ⲁⲛ ⲉⲃⲱⲕ ⲉⲡⲁⲙⲟⲛⲁⲥⲧⲏⲣⲓⲟⲛ --- ⲁⲩⲱ
ⲁϥⲱⲣⲕ ⲛⲁⲥ ⲛϭⲓ ⲡⲣⲣⲟ --- ⲡⲉϫⲁⲥ ⲛⲁϥ ϫⲉ ⲁⲛⲟⲕ ⲡⲉ ⲉⲗⲗⲁⲣⲓⲁ
ⲧⲉⲕϣⲉⲉⲣⲉ · ⲡⲣⲣⲟ ⲇⲉ ⲛⲧⲉⲣⲉϥⲥⲱⲧⲙ ⲁϥϣⲧⲟⲣⲧⲣ · ⲁⲩⲱ
ⲙⲡⲉϥⲉϣϭⲙϭⲟⲙ ⲉϣⲁϫⲉ ⲛⲛⲁⲟⲩⲛⲟⲩ ⲁⲩⲱ ⲛⲧⲉⲣⲉϥⲁⲓⲥⲑⲁⲛⲉ
ⲁϥϯ ⲡⲉϥⲟⲩⲟⲓ ⲉϩⲟⲩⲛ ⲉⲧⲉϥϣⲉⲉⲣⲉ ⲁϥⲡⲁϩⲧϥ ⲉϩⲣⲁⲓ̈ ⲉϫⲙ
ⲡⲉⲥⲙⲁⲕϩ ⲛⲑⲉ ⲛⲓⲱⲥⲏⲫ ⲙⲡⲉⲓ̈ⲟⲩⲟⲉⲓϣ ⲛⲧⲁϥⲟⲩⲱϣⲧ ⲉϫⲙ
ⲡⲙⲁⲕϩ ⲛⲓ̈ⲁⲕⲱⲃ ⲛⲉϥⲉⲓⲱⲧ ⲁⲩⲱ ⲁϥϯⲡⲓ̈ ⲉⲣⲱⲥ ⲉϥⲣⲓⲙⲉ · ⲁⲩⲱ
ⲛⲧⲉⲣⲟⲩⲥⲱⲧⲙ ⲛϭⲓ ⲧⲉⲥⲙⲁⲁⲩ ⲙⲛ ⲧⲉⲥⲥⲱⲛⲉ · ⲁⲩϭⲉⲡⲏ ⲁⲩⲉⲓ̈
ⲉⲩⲱϣ ⲉⲃⲟⲗ · ⲉⲡⲓⲇⲏ ϩⲛⲣⲉϥϣⲧⲟⲣⲧⲣ ⲛⲉ ⲛⲉϩⲓⲟⲙⲉ ϩⲉⲛ
ⲧⲉⲩⲫⲩⲥⲓⲥ · ⲡⲣⲣⲟ ⲇⲉ ⲁϥⲕⲱⲗⲩ ⲙⲙⲟⲩ ⲉϥϫⲱ ⲙⲙⲟⲥ ϫⲉ
ⲁⲓ̈ϯ ⲛⲁⲥ ⲛⲟⲩⲁⲛⲁϣ · ⲁⲩⲱ ⲙⲉⲛ ϭⲟⲙ ⲙⲙⲟⲓ̈ ⲉⲡⲁⲣⲁⲃⲁ ⲙⲙⲟⲥ ·
ⲡⲉϫⲉ ⲧⲉⲥⲙⲁⲁⲩ ⲛⲁϥ ϫⲉ ⲙⲁⲣⲉⲛⲕⲁⲁⲥ ϩⲁϩⲧⲏⲛ ⲛⲧⲉⲛϯ ⲉϫⲱⲥ
ⲛⲧⲉϭⲣⲏⲡⲉ ⲛⲧⲙⲛⲧⲉⲣⲣⲱ (sic) · ⲡⲣⲣⲟ ⲇⲉ ⲡⲉϫⲁϥ ϫⲉ ⲙⲙⲟⲛ
ⲙⲏⲡⲟⲧⲉ ⲛⲧⲉ ⲡϫⲟⲉⲓⲥ ϭⲱⲛⲧ ⲉⲣⲟⲛ ⲛϥⲁⲁⲛ ⲛⲛⲁⲧϣⲉⲉⲣⲉ ⲙⲙⲁⲩ
ⲛⲧⲥⲉⲛⲧⲉ ⲁⲗⲗⲁ ⲙⲁⲣⲉⲛϯⲉⲟⲟⲩ ⲙⲡⲛⲟⲩⲧⲉ ϫⲉ ⲁⲛϩⲉ ⲉⲣⲟⲥ
ⲣⲱ ⲉⲥⲟⲛϩ ⲁⲩⲱ ⲁ ⲡⲣⲣⲟ ϩⲉⲡ ⲡϩⲱⲃ ⲉⲛⲉⲥⲛⲏⲩ ⲛⲧⲁⲩⲉⲓ̈ ⲛⲙⲙⲁⲥ
ⲛⲑⲉ ⲛⲧⲁϥⲱⲣⲕ ⲛⲁⲥ ⲁϥⲕⲁⲧⲉⲭⲉ ⲛⲛⲉⲥⲛⲏⲩ ϩⲁⲧⲏϥ ϣⲟⲙⲛⲧ
ⲛⲉⲃⲟⲧ ⲉⲧⲃⲉ ⲧⲉϥϣⲉⲉⲣⲉ · ϫⲉⲕⲁⲥ ⲉϥⲉϭⲱ ⲉϥⲛⲁⲩ ⲉⲣⲟⲥ
ⲙⲙⲏⲛⲉ ⲁϥϫⲛⲟⲩⲥ ⲇⲉ ⲉⲧⲃⲉ ⲑⲉ ⲛⲧⲁⲥⲉⲓ ⲉⲃⲟⲗ ϩⲙ ⲡⲉϥⲏⲓ̈ ---
ⲁⲩⲱ ⲁⲥⲧⲁⲙⲟϥ ⲉⲧⲃⲉ ⲑⲉ ⲛⲧⲁⲥⲫⲟⲣⲓ ⲙⲡⲉⲥⲭⲏⲙⲁ ⲛⲥⲧⲣⲁⲧⲏ-
ⲗⲁⲧⲏⲥ · ⲙⲛ ⲑⲉ ⲛⲧⲁⲥⲉⲓ̈ ⲉϩⲟⲩⲛ ⲉⲣⲁⲕⲟⲧⲉ ⲙⲛ ⲑⲉ ⲛⲧⲁⲥⲃⲱⲕ
ⲉϣⲓⲏⲧ ⲙⲛ ⲡⲇⲓⲁⲕⲟⲛⲟⲥ --- ⲙⲛⲛⲥⲟⲥ ⲁϥⲥⲩⲛⲧⲁⲍⲉ ⲛⲁⲩ ⲁⲩⲡⲱⲧ
ⲉⲡⲉⲩⲙⲁ · ⲡⲣⲣⲟ ⲇⲉ ⲁϥⲕⲁ ϣⲟⲙⲛⲧ ⲛϣⲟ ⲛⲉⲣⲧⲟⲃ ⲛⲥⲟⲩⲟ̄
ⲉⲃⲟⲗ ⲉϣⲓⲏⲧ ⲉⲧⲃⲉ ⲧⲉⲭⲣⲓⲁ ⲙⲛ ⲧⲉⲡⲣⲟⲥⲫⲟⲣⲁ ⲛⲧⲉϥϣⲉⲉⲣⲉ ·
ⲙⲛ ⲥⲟⲟⲩ ⲛϣⲉ ⲛⲝⲉⲥⲧⲏⲥ ⲛⲛⲉϩ · ⲁⲩⲱ ⲥⲉⲙⲏⲛ ⲉⲃⲟⲗ ϩⲉⲛ
ⲧⲉⲕⲕⲗⲏⲥⲓⲁ ⲛϣⲓⲏⲧ ϣⲁ||ϩⲟⲩⲛ ⲉⲡⲟⲟⲩ ⲛϩⲟⲟⲩ ⲛⲧⲉⲣⲉⲥⲉⲓ ⲇⲉ
ⲉϣⲓⲏⲧ ⲁⲥⲱⲛϩ ϩⲛⲕⲉⲙⲛⲧⲥⲛⲟⲟⲩⲥ ⲉⲛⲣⲟⲙⲡⲉ · ⲉⲡⲥⲁⲏ ⲇⲉ
ⲁⲥϩⲉ ⲉϩⲣⲁⲓ̈ ⲉⲡϣⲱⲛⲉ ⲉⲧⲉϣⲁⲥⲙⲟⲩ ⲛϩⲏⲧϥ ⲁⲥϩϩⲩⲡⲟⲙⲓ̈ⲛⲉ ⲉⲣⲟϥ
ϩⲛ ⲟⲩⲙⲛⲧϫⲱⲱⲣⲉ · ⲁⲥⲙⲟⲩⲧⲉ ⲉⲡⲡⲉⲧⲟⲩⲁⲁⲃ ⲁⲡⲁ ⲡⲁⲙⲃⲱ
ⲁⲥⲧⲁⲣⲕⲟϥ ⲉⲥϫⲱ ⲙⲙⲟⲥ ϫⲉ ⲉⲓ̈ϣⲁⲛϫⲱⲕ ⲉⲃⲟⲗ ⲙⲡⲁⲃⲓ̈ⲟⲥ ·
ⲉⲡⲓⲇⲏ ⲛⲧⲟⲕ ⲡⲉⲧⲥⲟⲟⲩⲛ ⲙⲡⲧⲱϣ ⲧⲏⲣϥ ⲙⲙⲡⲁⲃⲓ̈ⲟⲥ ⲙⲛ ⲡⲛⲟⲩⲧⲉ
ⲙⲡⲉⲣⲧⲣⲉⲩⲕⲁⲁⲧ ⲕⲁϩⲏⲩ ⲛⲧⲁⲗⲉⲃⲓⲧⲟⲛ ⲁⲗⲗⲁ ⲙⲁⲣⲟⲩⲕⲟⲟⲥⲧ
ⲛⲙⲙⲁⲥ (sic) --- ⲛⲁⲓ̈ ⲇⲉ ⲛⲧⲉⲣⲉⲥϫⲟⲟⲩ ⲁⲥϯ ⲡⲉⲡ̅ⲛ̅ⲁ̅ · ⲛⲉϥⲁϩⲉ
ⲇⲉ ⲉⲣⲁⲧϥ ϩⲓϫⲱⲥ ⲛϭⲓ ⲡⲡⲉⲧⲟⲩⲁⲁⲁⲃ ⲁⲡⲁ ⲡⲁⲙⲃⲱ · ⲁϥⲧⲣⲟⲩⲉⲓ̈ⲣⲉ
ⲛⲑⲉ ⲛⲧⲁⲥϫⲟⲟⲥ · ⲛⲧⲉⲣⲟⲩⲧⲟⲙⲥ̅ⲥ̅ ⲇⲉ ⲁϥⲕⲟⲧϥ ⲁϥϩⲙⲟⲟⲥ
ⲁϥϣⲁϫⲉ ⲙⲛ ⲛⲉⲥⲛⲏⲩ ⲉϥϫⲱ ⲙⲙⲟⲥ ϫⲉ ⲁⲗⲩⲑⲱⲥ ⲁⲩⲥⲕⲉⲩⲥ (sic)
ⲛϭⲱⲃ ϯⲱⲓⲡⲉ ⲛⲛⲟⲩⲙⲏⲏϣⲉ ⲙⲙⲟⲛⲁⲭⲟⲥ ⲉⲩⲟⲩⲏϩ ϩⲉⲛ ϣⲓⲏⲧ
ⲙⲡⲟⲟⲩ ⲛⲧⲁ ⲛⲓⲙ ϫⲡⲟ ⲛⲁϥ ⲛⲧⲉⲓϩⲩⲡⲟⲙⲟⲛⲏ ϩⲱⲥⲧⲉ ⲉⲧⲣⲉⲥϭⲱ
ϩⲛ ⲧⲙⲏⲧⲉ ⲛⲧⲉⲓⲁϣⲏ ⲛϩⲟⲟⲩⲧ ⲛⲧⲉⲓ̈ϩⲉ ⲛⲧⲁ ⲛⲓⲙ ϣⲱⲱⲧ
ⲉⲃⲟⲗ ⲛⲧⲙⲟⲧⲛⲥ ⲛⲧⲥⲁⲣⲝ ⲛⲑⲉ ⲛⲧⲁⲓ̈ · ⲉⲓ̈ⲉ ⲛⲧⲁ ⲛⲓⲙ ⲁⲡⲟⲧⲁⲥⲥⲉ
ⲙⲡⲉⲟⲟⲩ ⲉⲧϣⲟⲩⲉⲓⲧ ⲙⲡⲓⲕⲟⲥⲙⲟⲥ ⲛⲧⲉⲓ̈ϩⲉ ⲛⲑⲉ ⲛⲧⲁⲓ̈ · ⲛⲉⲥⲛⲏⲩ
ⲇⲉ ⲛⲧⲉⲣⲟⲩⲥⲱⲧⲙ ⲉⲡⲉⲥⲃⲓⲟⲥ ⲁⲩⲡϣⲡⲏⲣⲉ ⲁⲩⲱ ⲁⲩϯⲉⲟⲟⲩ
ⲙⲡⲛⲟⲩⲧⲉ · ⲉⲛⲉ ⲁⲥⲣ ϫⲟⲩⲧⲟⲩⲉⲓ̈ ⲛⲡⲣⲟⲙⲡⲉ ⲉⲥⲟⲩⲏϩ ϩⲛ ⲧⲙⲏⲧⲉ
ⲛϯⲟⲩ ⲛϣⲉ ⲙⲙⲟⲛⲁⲭⲟⲥ · ⲁⲩⲱ ⲙⲡⲉ ⲗⲁⲁⲩ ⲥⲟⲩⲱⲛⲉⲥ ·
ⲉⲓ̈ⲙⲏⲧⲉⲓ̈ ⲡⲉⲡⲣⲉⲥⲃⲩⲧⲉⲣⲟⲥ ⲉⲧⲟⲩⲁⲁⲃ ⲁⲡⲁ ⲡⲁⲙⲃⲱ · ⲡⲛⲟⲩⲧⲉ
ⲇⲉ ⲁϥⲭⲁⲣⲓ||ⲍⲉ ⲛⲁⲥ ⲙⲡⲉⲓ̈ⲕⲉϩⲙⲟⲧ ⲉⲧⲣⲉⲥϫⲱⲕ ⲉⲃⲟⲗ ⲙⲡⲉⲥⲃⲓⲟⲥ
ⲙⲡⲉϩⲟⲟⲩ ⲛⲧⲉⲑⲉⲱⲇⲟⲕⲟⲥ ⲉⲧⲟⲩⲁⲁⲃ ⲙⲁⲣⲓⲁ ⲉⲧⲉ ⲥⲟⲩϫⲟⲩ-
ⲧⲟⲩⲉ ⲡⲉ ⲙⲡⲉⲃⲟⲧ ⲧⲱⲃⲉ --- ⲁⲩⲥϩⲁⲓ̈ ⲇⲉ ⲙⲡⲉⲥⲉⲓⲱⲧ ⲉⲧⲃⲉ ⲡⲉⲥ-
ϫⲱⲕ ⲉⲃⲟⲗ ⲁϥⲁⲩⲡⲉⲓ̈ ⲙⲉⲛ ϩⲱⲥ ⲣⲱⲙⲉ ⲛⲃⲓ̈ⲱⲧⲓⲕⲟⲥ ⲙⲛⲛⲥⲱⲥ
ⲁϥⲥⲉⲗⲥⲉⲗ ⲧⲉⲥⲙⲁⲁⲩ ⲉϥϫⲱ ⲙⲙⲟⲥ ϫⲉ ⲉϣϫⲉ ⲥⲉⲛⲁⲙⲁⲣⲁⲕⲣⲓⲍⲉ
ⲙⲡⲉⲧⲉⲩⲛⲧϥ ⲉⲟⲩⲥⲡⲉⲣⲙⲁ ϩⲉⲛ ⲥⲓⲱⲛ · ⲁⲩⲱ ϩⲉⲛⲣⲙⲛⲏⲓ ϩⲛ
ⲑⲓⲗⲏ̅ⲙ̅ ⲛⲧⲡⲉ ⲉⲓ̈ⲉ ⲛⲁⲉⲓ̈ⲁⲧⲛ ϩⲱⲱⲛ ϫⲉ ⲟⲩⲁⲛⲧⲁⲛ ⲙⲙⲁⲩ
ⲛⲛⲟⲩⲥⲡⲉⲣⲙⲁ ϩⲛ ⲑⲓⲗⲏ̅ⲙ̅ ⲛⲧⲡⲉ --- ⲁⲣⲏⲩ ⲣⲱ ⲥⲉⲛⲁⲉϣϭⲙϭⲟⲙ
ⲉⲧⲱⲃϩ ⲉϫⲱⲛ ⲛⲁϩⲣⲙ ⲡⲉⲭ̅ⲥ̅ ⲉⲧⲣⲉϥⲕⲱ ⲛⲁⲛ ⲉⲃⲟⲗ ⲛⲛⲉⲛⲛⲟⲃⲉ
ⲙⲛ ⲛⲉⲙⲡⲁⲣⲁⲡⲧⲱⲙⲁ ---- ⲡⲉⲡⲣⲉⲥⲃⲩⲧⲉⲣⲟⲥ ⲇⲉ ⲁⲡⲁ ⲡⲁⲙⲃⲱ
ⲁϥⲥϩⲁⲓ̈ ⲛⲛⲉⲓ̈ϣⲁϫⲉ ⲁϥⲕⲁⲁⲩ ϩⲛ ⲧⲉⲕⲕⲗⲏⲥⲓⲁ ⲛϣⲓⲏⲧ · ⲉⲩϩⲏⲩ
ⲙⲛ ⲟⲩⲥⲟⲗⲥⲗ ⲛⲛⲉⲧⲥⲱⲧⲙ ⲉⲣⲟⲟⲩ · ⲉⲩⲉⲟⲟⲩ ⲙⲡⲛⲟⲩⲧⲉ
ⲡⲉⲓⲱⲧ ⲙⲛ ⲡⲉϥⲡⲉⲣⲓⲧ ⲛϣⲏⲣⲉ ⲓ̅ⲥ̅ ⲡⲉⲭ̅ⲥ̅ ⲡⲉⲛϫⲟⲉⲓⲥ · ⲙⲛ
ⲡⲉⲡ̅ⲛ̅ⲁ̅ ⲉⲧⲟⲩⲁⲁⲃ ϣⲁ ⲉⲛⲉϩ ⲛⲉⲛⲉϩ · ϩⲁⲙⲏⲛ